六合彩聽得多買得多，「七合彩」你又知唔知係乜？經濟唔好，先施百貨唔想減價爭客，所以專登搞咗個「先施七合彩，易中到七彩」嘅遊戲嚟吸引顧客。
其實「七合彩」嘅玩法好簡單，玩開六合彩嘅香港人一定識得玩。部「七合彩」機一早已經預設一萬零一個唔同嘅號碼，只要喺部機上面㩒一個七位數字號碼，如果號碼同電腦預設嘅號碼相同，就可以攞走晒啲獎金獎品喇。至尊大獎有二十五萬免找數簽帳額，加埋二十五萬獎品；其他獎品重有DKNY同黛安芬等名牌。
要中晒七個數字，似乎難咗啲，不過噚日八方同班記者行家去玩過，竟然有人一㩒就㩒中咗，真係「易中到七彩」呀。
五部「七合彩」機分別放喺先施四間分店，其中兩部喺中環總店，全部都係向美國德州一間公司租番嚟，顧客只要喺後日至下年一月底期間，幫襯先施買三百蚊就可以玩一次，賭賭你嘅運氣。
﹙圖﹚先施百貨出動性感美女宣傳「七合彩」。 區民傑攝
傳真︰2623-9278
電郵︰