海馬騮（SeaMonkey）係乜東東？一句講晒佢只不過普通到唔普通嘅甲殼類生物，喺太子金魚街$10有3包，叫「豐年蝦」，由於蛋白質豐富，多數用嚟餵神仙魚！查實十年前已經有人將海馬騮當寵物養，當時嘅品種係「ArtemiaSalina」，淡水養，壽命頂多得兩星期，好無癮！
𠵱家嘅新品種叫「Artemianyos」，由「紐約海洋學會實驗室」(NewYorkOceanieSocietyLaboratory)最新研製，玩法大同小異，賣點係卵可以保存50年，遇鹹水即生，定時提供營養粉，悉心照料，壽命可長達2年，加埋4款造型趣致的魚缸，玩吓包裝，魚糧即寵物，升價60倍！
記者：陳彩記 攝影：楊錦文、細全
第一日，先將1號小包內嘅「清水淨化劑」溶於水，令淡水變鹹水；第二日，將2號小包內的粉狀「海馬騮卵子」注入魚缸，攪拌，白色微粒狀的初生海馬騮誕生了；第五日，開始餵飼一匙羹份量「營養粉」，之後每大概五日再餵飼，魚缸放喺日光照到嘅地方，就係咁簡單，勝在易養粗生兼襟玩。
金魚街阿瑪遜水族館老闆周生：「呢啲就係鹹水海馬騮喇？同隔籬檔幾蚊包嘅豐年蝦無乜分別喎！不過搵個靚啲嘅魚缸當寵物咁養，細路仔一定鍾意囉！」