美股雖然持續上升，但滙豐（005）腳軟就拖累港股回吐逾百點，恒指挫105點，收9995，成交金額48.84億元，市況依然沉悶。雖然美伊隨時會打仗，大戶亦做定空倉買保險，不過美國經濟數據比想像中好，本港出口貿易又有復甦迹象，出口商信心開始恢復，美林等大行又將港股評級調高，不宜對後市過份悲觀。
中國特種纖維（285）噚日勁挫92.65%後宣布停牌，停牌前報8.9仙，成交量高達1.48億股，接近公司總發行股數的10%，貨源可能是來自主要股東。
ｉ師傅話，據聞噚日勁沽中國特種纖維是上市保薦人光大證券，貨源是來自主要股東所抵押的股份。大股東曾將11.53億股抵押予財務公司，其後遭財務公司追討3700萬元。不過幸而今次只是獨立事件，並非因為股仔莊家出事，所以並未引起連鎖骨牌效應，其他二三線股仔依然各自各精采。
大凌（211）近期頻頻傳出有內地投資者想敵意收購，重話已經持有合共31%股權，但就未能入主董事局，傳聞大凌今次供股是為咗抗拒敵意收購。Cookie話，呢類炒作傳聞其實不可信，若持有31%股權竟然可以被拒入董事局，香港重有王法咩？若真係有心敵意收購，點會畀機會大凌提出供股建議，一早就提出99%折讓價收購建議，癱瘓公司一切運作啦。
港府終於同意賭波規範化，有線寬頻（1097）噚日持續上升，不過升勢則放緩，只升1.56%，收3.25元，睇嚟春江鴨亦開始獲利回吐。雖則話有線基本上已壟斷歐洲足球賽事，不過賭波合法化後，若賽事吸引更多觀眾收睇，無綫及亞視都可能會加入競投有關賽事轉播權，到時有線的轉播權成本可能會上升，或者得不償失。
阿虎