永泰亞洲小欖漣山啱啱開始收樓，發展商亦大搞節目，等多啲人認識。今日喺現樓舉辦「最優雅生活大獎」頒獎，由藝人王敏德、宣萱同陳慧珊攞獎。點解揀佢哋，因為佢哋有氣質、修養、品味同埋形象健康。例如陳慧珊閒時鍾意睇書，宣萱就愛行山等。
聽講佢哋三個各獲贈一支萬幾蚊嘅法國陳年佳釀，獎品同個獎項都好貼切。
另外，發展商又喺會所舉行展覽，分為幾個生活特區，包括「萄醉生活」、「芬芳生活」等，令參觀者可以感受法國南部風情。呢個展覽今個周末舉行。好似話只得兩日，因為個盤開始收樓，唔可以隨便搞活動，以免影響寧靜生活。
東涌新盤藍天海岸推售期不遠，為咗令市場對該區有多啲認識，香港興業動用2.5億，以銀彈攻勢做銷售同宣傳工作。除咗花成500萬製作電視廣告片，重會有全列地鐵流動廣告，超過100塊嘅地鐵廣告，耗資100萬嘅三維闊銀幕多聲道電影等，重有會將40萬個，印有藍天海岸標誌嘅八達通卡膠套，派畀市民，宣傳攻勢簡直喺鋪天蓋地。
集團市務部總經理陳子明話，個盤勝在有同區欠缺嘅1房，3房就較區內同類面積細（咁銀碼就細啲），重拍心口話各類型單位嘅價錢，都會比同區低。
國家總理朱鎔基話內地樓市可能過熱，但近期推售嘅內地樓盤好似冇受到影響。東莞駿景高爾夫花園，上個禮拜五六日，賣咗近六十個單位，套現三千萬。中原（中國）許大衞話，買家多數係鍾意打高爾夫球嘅人士。今個禮拜又會再推出二十伙發售，平均價維持每呎三百蚊。
駿景高爾夫花園佔地約三百五十萬呎，總樓面近五百萬呎，有三千四百戶，單位千三至三千幾呎，售價三十餘萬起。
另外，置業國際代理廣州翠馨華庭，示範單位開放咗十日，收到近六百個認購登記，上個禮拜六喺當地公開發售，賣咗逾二百五十伙。該盤計劃今個禮拜來港展銷。單位售價十六萬幾起。
北角半山老牌豪宅賽西湖大廈，最近全面翻新，整個屋苑都畀綠色網罩住，住客要做「網中人」。蘭西聽利嘉閣講，有租客因而搬走，特別係啲日籍客。租金就一直係咁跌，𠵱家得番十三四蚊呎。
聽講屋苑要翻新嘅消息喺舊年已經傳出，當時呎租都有十八九蚊，但到今年7月，開始搭棚動工時，已降到十六蚊，𠵱家就落到得番十三四蚊，一年跌咗近三成，啲業主亦好無奈。不過唯一慶幸係因租金平，都吸引到租客入市，𠵱家一個月有五六宗成交。
蘭西
電郵地址：