港府財赤高企，財爺梁錦松一再呻窮，但係佢去到倫敦，就同富豪一樣咁豪。八方噚日話過，阿松今次喺英國訪問行程神秘，住邊度問極都唔肯講。原來，佢住嘅地方真係唔嘢少。
八方嘅同事喺倫敦幾經辛苦，終於打聽到阿松喺文華東方海德公園酒店落腳，於是即刻去睇睇，去到酒店門口已經見到有支香港特區旗掛咗出嚟，歡迎香港財爺入住。
入到酒店大堂，金碧輝煌，一間普通房，連17.5%稅，盛惠四百幾五百英鎊，即係港幣六千蚊一晚；套房更加貴，Deluxe千一鎊，Presidential要千八鎊，Sovereign要成兩千英鎊，連埋稅即係港幣三萬蚊；香港𠵱家好多人幾個月人工都冇三萬蚊。阿松喺倫敦住四晚，可能等於人哋做一年。
阿松條數，唔知邊個找呢？
﹙圖﹚文華東方海德公園酒店門口，掛咗支香港特區旗出嚟，歡迎香港財爺入住。
傳真︰2623-9278
電郵︰