時近年尾，但香港車壇仍見氣氛緊張，好似戰雲密布咁，皆因新一輪CityRV大戰如箭在弦嘛！繼早前萬事得Mazda2推出之後，亞Mark早前話過會響澳門大賽車之後面世嘅福特Fiesta，亦鐵定響下周二（12月3日）正式向香港傳媒發布，並且會響周末舉行大型新車首展㖭！相信屆時又會惹來車壇一陣好大嘅迴響㗎！此外，剛於日本面世嘅全新三菱Colt車系，代理亦正密鑼緊鼓，準備響明年初隆重登場；據知，新車響東瀛本土評價甚高，佢除咗配用一台全新設計嘅MIVEC1.3公升直4偈（馬力90匹）外，重有第3代CVT無段變速波箱，令耗油量低至20.0km/L之餘，佢重有多變嘅兩排座椅組合，後排可獨立前後移動外，既可放平成卧鋪，又可以收摺起㖭！而前排乘客座椅內置儲物匣外，並有AutoLight同車速感應電摺鏡等裝備，睇嚟新一代CityRV，勢必掀起車迷嘅購買慾㗎！