政府車輛管理處舉行「二○○二年安全駕駛獎頒獎禮」，十年內駕駛紀錄完美無瑕者，先可以得獎。二百四十九位得獎司機中，近百五人出席。
噚日有幾位有人情味嘅上司，特登抽空出席自己位司機嘅大日子，包括水務署署長高贊覺同稅務局局長劉麥懿明。對於資源增值後日益增加嘅工作，劉太嘅司機何寶生全無怨言不特止，重話多嘢做證明佢有存在價值，更加連新聞官嗰份都撈埋，每朝起身上網睇報紙，揸車時將有關稅局嘅新聞逐樣話畀劉太聽，連電台烽煙節目都細心錄起，以免劉太錯過。
高贊覺同司機梁樹強只合作咗一年，已經好似兄弟咁Friend，日日喺車上討論時事。至於曾經幫前任房屋局局長黃星華揸咗八年車；𠵱家專門接載馬時亨出入嘅司機樊惠森，就話保密同守時係第一守則，乜嘢都唔肯講。
﹙圖﹚稅務局局長劉太恭賀佢嘅司機何寶生攞到十年安全駕駛獎狀。
傳真︰2623-9278
電郵︰