呢排我羅拉睇到唔少關於樂壇天后麥當娜（Madonna）嘅報道，但係都係唔多好嘅新聞，先係話佢上次出席占士邦新片《不日殺機》嘅皇室御演見英女皇嗰陣，幾十歲人居然騰晒雞，同女皇握手重緊張到成身硬晒，俾啲外國傳媒笑到面都黃；跟住又話佢同老公基里奇（GuyRitchie）買蛋糕冇錢畀，搞到要通街問人借。
不過買蛋糕呢單嘢，其實證明咗佢兩公婆錫個仔羅科（Rocco）啫！講開佢哋個仔羅科，話咁快原來已經兩歲幾囉，佢𠵱家鬼咁活潑，成日周圍走之餘重學識踩單車㖭。早幾日佢老竇基里奇就忙裏偷閒，同個仔喺佢哋位於倫敦西部嘅屋企附近踩單車，雖然羅科仔要靠輔助轆至踩得掂，但係都一樣玩到忘晒形，兩父子沿途傾得好開心，做老竇嘅基哥亦一路昅到實，成個慈父樣出晒嚟。
但係唔知基哥同娜姐係咪太保護佢哋嘅仔女，娜姐早幾日寄咗封抗議信畀首相貝理雅，指政府立例批准遊人喺佢哋英國西部郊外嘅別墅一百碼外活動係唔啱嘅，話會影響佢哋一家人嘅安全喎！