許志安日前被本報記者拍得他另結新歡，前日下午鄭秀文在港台接受訪問時對此不肯表態。前晚鄭秀文接受本報專訪時則表示，她和安仔處理緋聞前不會互相溝通，自己信任身邊的人，亦不需要對方解釋，擺到明是力撐安仔。
許志安日前和張衞健等好友在銅鑼灣飯敍後離開食肆時，被本報記者拍得他搭着一個樣貌與張茜十分相似的女子，事後安仔解釋該女子的身份時語無倫次，其後才承認是張衞健的契妹。
前日下午鄭秀文（Sammi）在港台接受訪問時避談安仔結新歡，即使把報紙放在她面前，她亦視而不見。近年安仔和Sammi刻意低調處理戀情，二人都不肯回應有關感情的問題。
前晚Sammi接受本報記者專訪時表示，她相信身邊的人，就算有緋聞見報亦不需對方解釋，因為朋友之間一定要信任，Sammi此言一出擺明是投了安仔信任的一票。
每次Sammi或是安仔傳出緋聞，安仔都表現得較緊張，亦會作出解釋；相反Sammi則較少刻意澄清，Sammi說：「呢個係個性問題，每個人性格都唔同，不過最緊要開心就得啦。講有講嘅好處，但係講完咪又係咁，到時又會再有新嘅緋聞傳出。」
問Sammi會否和安仔就緋聞先溝通才向外回應？她說：「我哋冇共識，亦冇通電話，唔需要特別去傾。有乜嘢事發生，知道應該相信啲乜就已經足夠，見咗報亦唔需要去解釋，我會相信身邊嘅人，作為朋友，信任一定要有。」
Sammi對於她和安仔之間關係，仍然不肯直接回應，她只說：「呢個問題近排我俾人問咗九十幾次，但係我仍然堅持自己嘅作風，感情嘅嘢唔會交代，亦唔會講。我父母都唔需要我交代，點解我要同出面講？屋企人唔會擔心我，咁大個人有乜好擔心？佢哋恨不得我同佢一齊耐啲，有咁耐得咁耐呀！」
Sammi曾表示想在三十多歲時結婚，婚後以家庭為重，不過現時卻轉了口風，她說：「我𠵱家冇咁諗，三十幾歲先算啦，我唔會再界限自己幾多歲做啲乜，人生好多變數，講咗到時又未必係咁，不如到時先去諗繼續點行。」
Sammi明白自己選擇了不說，外界自然多揣測，她說：「唔怪得出面嘅人嘅，咁佢哋多咗空間去想像，我都預咗，呢啲嘢好正常。」
安仔曾用朦朦朧朧四字去形容和Sammi的感情，而Sammi則說：「我都諗唔到應該用乜嘢形容詞，撲朔迷離？我唔介意人哋咁樣形容，我自己好清楚情況係點就得，一切開心就得。」
早前曾傳Sammi有同性好友，她表示現已不再生氣，她說：「點解要為啲咁嘅報道而唔開心？做呢行有苦自己知，咁耐都慣啦。」
此外，鄭秀文新碟《WonderWoman》日內推出，Sammi着了色彩繽紛的服裝拍攝封面，希望在聖誕帶給大家歡樂氣氛，而新碟首批訂單，已達白金數字。
採訪：蔡如玉