我每次放假就有衝動想離開香港鬆一鬆，但好多時都因為唔夠時間又或者銀根有限而打消念頭，但皇天不負有心人，最近就俾我搵到一個$8團，加埋服務費都係$48，包八餸一湯的午餐之餘重可以即釣即食鯨龍魚，雖然只係深圳一日遊，但勝在夠平，離開香港唞一唞都唔錯！
記者：黃希知 攝影：偉信
逢星期二至六刊出
羅湖火車站集合→參觀鹿兒莊產品展銷部→參觀冬蟲草繁殖基地→參觀吉祥物館→大鵬灣休閑漁莊鯨龍養殖場→回程
在羅湖集合後，頭幾站都係去唔同嘅地方參觀同購物，所以對我呢個有過度活躍症嘅人嚟講，一聽到導遊話有鯨龍釣，成個人即時醒晒，聽講鯨龍下下有成七、八斤重，呢世人都未試過釣咁大條魚，咁好機會梗係唔會放過啦！
休閑漁莊位置偏僻，感覺同個名一樣夠晒悠閒，一入門口就見到一大隻叫海皇星號嘅石屎船，再向下望，原來下面就係養滿鯨龍嘅魚塘，但因為一條閒閒哋都有七、八斤重，而且好易上釣，為免浪費，每團只可以釣一條。果然，將條比普通粗幾倍嘅魚絲連同魚餌拋入魚塘後，所有魚一湧而上，唔使三分鐘，一條八斤重嘅鯨龍已經成功上釣。
入到漁莊的手信店，只見兩邊長枱擺滿不同的土產，好似魚乾、鯨龍XO醬等，雖然最終都無乜嘢收穫，但在店內提字做留念都唔錯，老闆話再收集多啲就會掛晒上牆，話唔定我嘅傑作都可以有得展覽！
喜歡的話，可以留低租間房住番晚再慢慢玩，但房就只得17間，而呢間海景船房就只得一間，每晚?250，我對佢簡直係一見鍾情，但可惜早就俾人Book咗。
午餐有八餸一湯兼白飯任添，最令我意想不到的，是午餐除咗有剛釣上來的鯨龍之外，重有蝦有雞，份量十足，味道又唔錯，淨係食呢餐都值回票價。
我第一次食鯨龍，味道好鮮甜，呢幾個景點我都係第一次嚟，我頭先買咗好多湯包同藥材，價錢比香港平幾多就唔知，但肯定平過香港。
我買咗藥材湯包同一個紫觀音，呢度買平過香港，但係一定要講價，整體嚟講個團幾好玩，呢啲景點全部未去過，幾有新意，價錢OK玩得過。
我覺得價錢適中，行程都安排得幾好，幾輕鬆唔會好緊迫。我喺吉祥物館買咗隻紫水晶，香港買要過百蚊一隻，呢度就賣一百蚊隻，後來俾我講價講到幾十蚊已經有交易。
入到產品展銷部，我同其他團友先入去一間類似課室嘅房坐低，原來係專人用唔鹹唔淡嘅廣東話介紹各種鹿製產品。面對各種珍貴藥材同湯包，例如鹿腳筋、鹿血膏及人參話梅等，我都不大感興趣，反觀其他團友就比我雀躍得多。
冬蟲草繁殖基地就在鹿兒莊附近，但繁殖基地外表比鹿兒莊簡陋，入到去聽完一輪「硬銷」之後就到買嘢時段，冬蟲草同補酒就最吸引公公婆婆。
跟團返內地，買貔貅差唔多成為指定動作之一，呢個團都唔例外，吉祥物館比我想像中重要大，好似香港的珠寶行，場內擺放咗兩隻大貔貅，聽講貔貅喻意有入無出，摸過會帶嚟財運，人人包括我在內都第一時間摸番夠本。貔貅的售價由百多元人民幣到幾千元人民幣不等，不過一定要講價，因為可以由百多元講到幾十蚊。
此團只限星期一至五，每日開一至兩團（要視乎報名人數而定），每團最多45人，必須於最少三日前報名，可透過電話報名再用過戶形式繳交團費，除團費$8外，每人需另加$40服務費。
電話：27762774
地址：大埔寶鄉街47號D1地舖