噚日英國《太陽報》就話列斯領隊雲拿保斯因為有份副業──幫ITV電視台做歐冠盃講波佬，雖然唔可以賴晒因為咁樣令佢分心，以致列斯最近成績麻麻；但我求大俠喺度呼籲呢位前英軍領隊專心教番好列斯先，唔好再做講波佬嘞。
睇嚟雲拿保斯都真係幾鍾意喺電視台份工，上年幫米杜士堡成功護級之後，都寧願留番響電視台，唔繼續教落去。到𠵱家復出成為列斯領隊，都重係唔肯放低電視台份工。
咪話我求大俠唔提醒雲拿保斯，列斯一路沉淪，佢老人家實聽俾列斯炒魷，咁就可以順理成章成為ESPN嘅客席「失業」講波佬，好似列特、奧拉利及格拉咸咁，雲拿保斯，你甘心嗎？
阿仙奴官方網站最近搞咗個投票，徵求球迷意見睇吓大家覺得未來四仗，包括聯賽對維拉及曼聯，以及歐冠盃對羅馬及華倫西亞，究竟邊場係最難打。結果真係出乎意料，接近五成球迷竟然覺得對維拉係最惡啃嘅比賽！其實我求大俠覺得球迷最擔心嘅唔係對邊隊，而係雲格重會唔會出施文把關就真。
多蒙特個靚仔後衞基爾未有隨隊出發去俄羅斯，應付歐冠盃作客對莫斯科火車頭嘅賽事，不過基爾唔係有傷或者停賽而唔隨行，原來佢響出發當日瞓過龍唔知醒！我求大俠真係為德軍心噏，舊時德軍紀律嚴明，到𠵱家竟然有一位明日之星話唔知醒未能隨隊遠征，唔怪得德國隊一蟹不如一蟹啦！
巴塞隆拿一直好想簽得阿積士嘅隊長捷古，而佢哋嘅荷蘭國腳法蘭迪保亞，睇嚟響下季都難望有正選，係時候告老還鄉。最近法蘭哥就講到明想返阿積士踢風流波，呢個交換安排其實都幾好，最開心一定係法蘭哥；事關佢話晒響荷蘭足球有啲地位，返到去阿積士又可以繼續扮大佬咁鬧吓啲新人囉！
究竟邊個接得住米路留低嘅中國國家隊帥印呢？傳就傳過好多個，一時話杜斯亞，一時又話史高拉利，之前亦傳過曾經響香港踢過波嘅荷蘭名宿海恩亦有機會接任。噚日又有消息話中國足協又會將搵新帥嘅決定押後，真係多得大陸傳媒，啲消息亂咁傳，你唔厭我聽都厭啦！