最近唔少藝人因為飲醉酒揸車而搞到一身蟻，就好似梁家輝同關秀媚咁，前者因為涉醉酒駕駛兼打人，後者就涉嫌醉酒駕駛同向警方虛報資料。其實作為藝人就真係要樹立榜樣，兼且應提高警覺，就好似陳曉東，前晚佢去咗跑馬地飲酒，佢明知自己要揸車，所以都唔敢飲咁多，同朋友湊吓高興就算數，認真有自制能力。
東東最近買咗一部同謝霆鋒撞咗嗰部同型號嘅法拉利360Modena，前晚十一點幾，東東就揸住呢部靚車，去咗小春緋聞女友Marianne王敏慧喺跑馬地開設嘅紅酒館消遣。不過，東東逗留到凌晨一點半就走人，馮仁昭見到東東冇乜面紅重鬼咁清醒，估計東東應該冇乜點飲酒，佢一見馮仁昭喺度，重好關心咁問：「嘩！咁夜你重喺度呀？」
馮仁昭問佢係咪同朋友去紅酒館飲酒，但東東冇答到就開車走人，咁啱東東開車嗰陣，Marianne喺酒吧出面同東東拜拜，睇嚟佢哋兩個都幾熟絡。
鄭裕玲噚日喺上環為先施百貨舉行嘅「先施七合彩．易中到七彩」主持啟動儀式，大會特別安排兩位男女模特兒着住泳裝出場，問到嘟嘟有冇被赤膊嘅男模特兒嚇親，佢話：「冇！佢哋事前都有話畀我知，不過嗰位男模要做吓運動。」
嘟嘟重話最近學緊電單車，不過早排整傷手同肩膊，呂方早排亦勸佢放棄，佢話：「佢都有叫我唔好學，不過前幾日佢架車攞咗去整，佢話好唔方便，又叫我繼續學。」
九人女子組合Cookies噚日去商台錄音，不過其中五位成員就有事缺席，只係剩番Cookies四位成員Helena、Theresa、Stephy同Miki，隊長Stephy話大家最近忙於拍網上連線劇《百分百感覺》續集，佢哋日前重試咗唔少造型。一向身形高䠷同皮膚白淨嘅Theresa，竟然被安排扮阿差，Theresa話：「造型真係好好笑，雖然係咁，但我一啲都唔介意。」
男子組合Shine噚日去商台接受錄音訪問，由於唱片銷量理想，佢哋話夜晚會掏腰包請唱片公司嘅同事食飯。Shine嘅徐天佑同黃又南話會夾份拎四位數字嘅錢出嚟，天佑話：「我通常月頭會大使啲，我好鍾意去酒店食一餐，至於月尾就會留喺屋企食杯麫。」
方中信同郭可盈主演嘅無綫電視電影《鬼醫》噚日喺電視城試造型，佢哋兩個飾演醫生，重會發展一段人鬼戀，劇情類似西片《人鬼情未了》。問方中信喺劇裏面做邊一科嘅主診醫生時，方中信竟然無厘頭大講三級嘢，佢話：「梗係婦科啦，兒科又賺唔到錢，婦科好搵啲，啲女人一個月流幾次血又要去睇醫生，啲女人錢幾好搵，不過成日要對住女人啲重要部位都幾厭㗎。」