「上環假日行人坊」因大笪地應運而生，勝在識執生，「內容」次次不同，一於表演、免費小食、工藝小檔「輪流」上陣，不但𠱁得細路開心，也滿足客人尋寶心態，難怪有檔主說：「市民開心，自然肯使錢……」
記者：李玉蘭 攝影：楊錦文
10月27日開業，雖只假日開檔、35個檔口、5小時營業時間，但好處是日租$100，吸引很多人開業、試業、創業！主辦單位還不時換上不同的檔口，務求令市民有更多選擇，有乜好料？即Check！
攤檔輪流轉
檔主高呼：「所有聖誕物$10有找，重唔快啲埋嚟睇吓！」抵買全因這是出口美國的應節剩貨，貨品賣一件少一件。畀貼士你，件件貨品一件起，兩件止，只要淡淡定講價，用$50已經可以買齊給一家四口的聖誕禮物，又或布置出一棵靚靚聖誕樹。
阿Moon第一次創業，擺賣的手作業看似很簡單，有瓦通紙立體磁石等精品、可以刻名的磨砂玻璃器皿，她說：「貨物件件獨一無二，最啱送禮，全部係我同妹妹一起做，售價由十元八塊起，但可以喺5小時內做到三四百元生意，就代表多人認同喇！」妹妹搭訕：「最開心係即場做到客人嘅要求、有人讚特別。」
四個大專畢業生獨沽一味賣薰衣草：「事緣我們去北海道旅行，覺得薰衣草有可為，就每人夾千零蚊，喺澳洲入口天然薰衣草產品，重搵庇護工場幫我哋做一支支嘅薰衣草花，送禮自用兩相宜，每日都賣過千蚊。」
在中華藝舍教按摩、刮痧、美容的方師傅中氣十足：「城市人最多頭痛、頸痛、肩痛、偏頭痛，要通通佢！」說畢使勁在記者肩上揉按拍打，不消兩分鐘，肩痛即時紓減，佢重話：「推拿加刮痧，一般10至15分鐘收$80至$120，總之做到好為止，80歲以上免費。」
呢幾個攤檔全部免費，不過不定期開檔，想玩想食就要睇你運氣喇！
小資料
地點：上環西港城附近的摩利街及永樂街
時間：12:00nn至5:00pm
日期：現在至2003年1月26日，逢星期日及公眾假期
查詢電話：28524017