近排成日打邊爐，難免對肥牛、海鮮等配料開始覺得有少許厭，今次介紹嘅火鍋店有重慶活魚又有活兔食，對我嚟講夠晒刁鑽又有新鮮感，當然第一時間即刻去試試。
記者：黃希知 攝影：Manny
一叫兔肉，侍應即刻走去門口旁邊個籠度捉隻大山兔入舖內，負責人話隻隻都有成四斤半左右重，因為成日通山走，活動得多肉地自然無咁老，淥一陣就食得，咬落同雞肉近似，但比雞肉較韌。
江團魚?38/斤
另一鎮店菜就係重慶烏江大頭魚和江團魚，全部即揀即活劏，大頭魚肉質有少許爽口，而江團魚雖然細條，但魚肉又腍又滑又少骨，所以唔少港客包括我都鍾意食，但價錢比大頭魚就貴一倍有多。
電話：（0755）82444677
地址：深圳市福田區八卦一路食街（八棟）