走入時裝店，盤算着今個冬天入咩好，但其實早已心裏有數，來來去去，最需要也不過是大褸、頸巾同冷帽，就等同街頭小食的款式如何多花樣，最多人幫襯點都係離不開煎釀三寶。不過，煎釀三寶唔係紅腸、茄子就係青椒，無得俾你揀，不過冬日三寶的選擇卻多的是。今日就帶大家去紅磡一個有九千呎的特賣場，以超筍價掃勻多款大褸、頸巾同冷帽。
記者：尹珊珊 攝影：黃子偉
Model：Pinky、亞軒(FromSunSpot)
唔好以為「冬日三寶」係記者生安白造，在街頭直擊的三十位型男索女中，幾乎人人都想執番件寶，最後經過一人一票的直選結果顯示，最多人打算在冬日搜購的，都係有保暖作用的大褸，以16票之差大比數拋離其他兩名對手，緊接在後的是三角巾、冷頸巾、披肩呢類的冷巾，合共有10票之多，成績算是意料之內，反而今年街頭大熱的冷帽，竟然只得4票，最大原因係𠵱家未算凍，令人重未有意欲買冷帽，不過相信到咗十二月，冷帽會愈來愈受人青睞。
街頭直擊
第一寶
唔使講，冬天梗係一定要買褸啦！今年香港經濟唔係咁好，最好揀件抵着又襟興嘅。
OnPinky
原價：$750 特賣價：$250
日本品牌Groeey出品的超短身毛毛褸，色彩搶眼奪目，着上身絕對能令你成為視線焦點，內層有一層裡面，唔怕拮肉。
原價：$290 特賣價：$100
由人手編織的勁粗冷帽，純白中混有多種顏色，每頂皆獨一無二。
On亞軒
原價：$1,695 特賣價：$500
曾經流行一時的TheNorthFace羽絨褸，幾乎人人都有一件在手，雖然大有機會同人撞衫，不過$500的價錢始終是一個極吸引的賣點。
原價：$195 特賣價：$30
無論何年何月，格仔頸巾始終經得起潮流的衝擊，或許欠缺點點新意，但勝在款式夠晒長青。
第二寶
就算着多多衫，一入冬都會戴頸巾，費事凍親條頸啦！早排睇報紙話今年興三角巾，自己都買咗幾條嚟襯衫。
第三寶
冬天一定要帶帽，最怕俾風吹到頭都痛，趕時間又或者無心情，戴頂帽就可以頭都唔使Gel，不過無論潮流興乜，心水選擇永遠都係襯衫最易的淨色冷帽。
潮流易賣區
地址：紅磡民樂街23號駿昇中心14字樓C座
電話：26270883
時間：星期一至五中午12時至晚上8時，星期六、日早上10時至晚上6時。