故事發生在五十多年前，從一個以擔挑、前火爐後碗碟、周圍走賣魚蛋粉的謝桂茂開始。一次走鬼，成班差佬追緊自己，於是把心一橫，跑上香港仔榕樹頭斜路找堆石頭，圍住生財工具，以避耳目。後來他索性在這裏開檔，並用石頭做個窿繼續賣魚蛋粉，呢個就係山窿魚蛋嘅發源地。原來最危險地方就是最安全地方，因為山窿旁邊就是警察局！
記者：梁佩芬 攝影：陳智良
逢星期一至日刊出
一路做到70年代左右，開始放棄「捐山窿」，在山窿附近的舊大街開舖，到八十年代擴充營業，新舊二舖都靠一個廚房供應魚蛋粉，更開始賣埋牛腩、生魚蛋及牛丸等。五十多年，每個人都與謝記有一個故事……
「諗番第一次食謝記都四十年有多囉！嗰時重喺後面榕樹頭個山窿仔度開檔。以前就三、四個人圍住條長木櫈食，無位就踎喺街邊就咁食，無辦法，香港仔雖然多熟食檔，但賣魚蛋粉就只得謝記。重記得以前同謝記都住喺石排灣木屋區，朝朝都聽到『撻撻』聲喺度打魚蛋……今日都唔知點解，行行吓又嚟番謝記。」
「香港仔係我嘅老家，細細個就畀阿媽捉嚟食魚蛋粉。到𠵱家住土瓜灣，一放假都要山長水遠入到嚟食碗先安樂。但我要投訴，就係我最鍾意食嘅炸魚片，每日到兩點先有得食，炸多十幾條都得呱?!」
從大陸來港定居，現住華富邨。初到埗乜都唔識，街坊鄰里介紹來謝記食魚蛋粉。嗜辣的她當然最吸引是一盅盅辣椒醬，好香但又帶上陣陣甜味，每次食粉都至少落兩匙。
廖先生曾經同謝記個仔做過同學，初初都無人知佢有個鼎鼎大名的魚蛋粉老竇。住喺香港仔四十多年，細路仔時未試過「捐山窿」，都係近七、八年先開始光顧。
「以前朝早返工，放工謝記都閂門，幾十年都無機會試。近年返夜班，每日下午兩點起身，就嚟食個早餐。我就乜都食，最正係牛腩魚蛋兩撈。」
五粒魚蛋加兩塊魚片，用大地魚及豬骨熬出來的鮮甜湯底，就係咁賣咗五十四年！
牛丸、魚皮餃、魚片、墨魚丸及魚蛋，一大鍋供四個人食。香港旅遊書都有介紹呢碗雜鍋，不少外國遊客一坐低，就識叫「MixNoddle」。
用魚肉搓成魚皮，包着豬肉及冬菇，細細粒，皮薄餡多，熟後魚皮不會爛成糊狀，除了魚蛋外，是歷史最悠久的製品。
採訪當日出盡力幫我的謝記三嫂憶當年：
「老爺以前貪香港仔係漁村，可以每日都有新鮮魚入貨做魚蛋……每朝五六點就送魚嚟謝記，我就要跟單，同工人做魚蛋。」
1996年，前港督彭定康巡視南區，當行到舊大街時，興之所至，走入歷史悠久的謝記試了招牌魚蛋麫，更親自送了幅畫給謝記。咁多年，兩位前警務處長李君夏同許淇安都曾到此一遊，劉德華、周潤發都曾是座上客。
地址：香港舊大街80-82號地下
電話：25523809
營業時間：10:00am-6:00pm