恒指連升10日進帳521點後斷一斷纜，昨日回落105點，屬正常調整，埋單9995，期指則仍喺1萬大關之上，收10014，跌88點，高水19點。
中銀香港（2388）係少數有得升嘅大隻藍籌股之一，最高8.45元，收8.35元，升高1格。中銀下周一正式晉身恒指新貴，啲基金可能喺本周五之前，計比重買入中銀，中銀升多幾格唔出奇，短炒搵中銀Call輪對象，最夠刺激兼且買賣唔難嘅，係9458，隻輪明年2月夠鐘，現價23.7仙，溢價9.5%，槓桿率35.2倍，正股上落三兩毫，隻輪輕易升跌幾十個巴仙，好多人玩即市，成交金額僅次於9462。另外隻成交亦唔細嘅9459，數據唔錯，現價42.5仙，槓桿率19.6倍，亦係非常爆炸，溢價則只係6.9%。
滙豐（005）低開75仙，拖低恒生（011）。結果滙豐唔見1.25元，恒生唔見50仙。恒生跌幅0.16%，幅度有限，但隻熱門恒生Call輪9402則跌到變形，收30仙，唔見6仙，跌幅17%。槓桿率大嘅窩輪，升之時好夠爆炸力，跌之時則好殺傷力。隻輪明年1月夠鐘，溢價2.6%，槓桿率28.7倍。現價同上周五高位比較，唔見25%，可輕注博反彈。
恒指Call輪9552跌8%，收33.5仙，恒指有望重越1萬，吼低位揸啲9552。
章盛