每逢年尾，日本例牌有一大堆頒獎典禮，而天后濱崎步由於逢請必到，因此經常有獎攞。而今年步姐重威，大前日佢先至連續三年成為「ALLJAPANRequestAward」大獎得主，前日又以三連霸嘅姿態，奪得「NailQueen2003」大獎，主辦單位即刻擺佢上神枱，講明下年唔再頒畀佢。
步姐攞咁多乜乜三連冠，證明佢足足紅咗三年，喺日本藝能界嚟講，除咗一啲實力派之外，偶像派真係少見，難怪步姐咁得戚。
講番步姐啲指甲，大家都知佢請咗個指甲美容師三浦加納子，前日三浦就落重本幫步姐整咗套真鑽石指甲，十隻手指夾埋有一百粒白鑽，共重六點五卡，重閃過步姐面上啲閃粉。步姐話好多謝大家連佢咁細微嘅地方都關注到，令佢好開心，但都有少少壓力喎。