中富控股（1191）噚日公布截至2002年7月止全年業績，雖然較上年蝕少咗，但計落都有成1.386億元，連續兩年蝕過億元，都咪話唔得人驚。
曾經炒過呢隻股兼且輸鋪勁嘅經紀陳話，市場傳聞中富有意放盤。經紀陳長歎一聲，佢話2000年中富在科網股熱潮中，曾因投資一個科技項目，賺過兩億元，當日佢亦跟風炒過一轉，賺過一筆。
舊年佢又收到風，話中富有意轉型唔搞建築，轉搞直升機場，並有大陸炒家落場坐鎮，由於食過番尋味，於是又落場玩過，點知今次就幾乎係摸頂，在0.30至0.40元之間入貨。
雖然佢收到風，話大陸炒家重未派到貨，但唔知點解隻股就係咁跌，股價一沉不起，以噚日收市7.6仙計，若然揸到𠵱家，真係等同totalloss。
經紀陳又話，有關管理層近日好似只專注在阿仔大中華科技（8032）嘅中藥生意，對阿媽就不聞不問，所以有放盤傳聞。
慕容小初