雖然𠵱家香港的冬天唔算太凍，但當氣溫跌至十度八度時，點都需要一部暖爐為你抵禦寒流，趁住寒冬漸漸逼近，市面上已開始陸陸續續有新款暖爐登場，而且每部都各有獨特功能，此外，更有新推出的迷你座枱式充油暖爐，以及兼具暖風功能的冷氣機，非常慳地方，可以幫你解決收納呢個大難題，就算寒流襲港都無有怕啦！
記者：尹珊珊
攝影：陳陶鈞、楊錦文
ImageGirl：Natalie
嚴格來講，冷暖氣機唔算係咩新產品，只不過未受普及使用，所以好多人都唔知道冷暖氣機同冷氣機可以二合為一，好似呢部飛歌牌出品的GPA3078H，原理係將壓縮機頭運作時所製造出來的熱力，以對流方式(ReverseCycle)傳送回屋內。情況同開冷氣剛剛相反，如果開冷氣的話，冷風會吹入室內，而摩打轉動時所發出的熱力需要散走，就會由機尾噴出街外，由於冷暖風機加有一個內置變壓器，可以將熱氣倒流，就會造成暖氣吹入、冷氣排走的效果。
一部有t匹的冷暖氣機約可製造650Watt的暖氣，足夠一間60至70呎的房間使用，同時此機具有一級能源標籤，比普通暖爐慳電之餘，本身售價同一般冷氣機無異，又唔需要另外搵地方放多部機，咁就可以解決阻碇的問題。
型號：GPA3078H
尺寸：47cm闊×52.5深×35.3cm高
匹數：t
製冷量：6700BTU/hr
售價：$1,898，包標準安裝（太平）
現場測試
Natalie試後感：「初初只係有冷風，但過了十零分鐘左右，感覺到慢慢開始暖起來，而且吹出來的暖風幾舒服，唔會灼熱，最正係部機都幾靜，同一般冷氣機差唔多，我諗睡覺時都唔覺嘈。𠵱家先知有呢種冷暖氣機，原來都幾實用，至少唔使另外買多部暖爐。」
BB仔的防寒能力較低，故冬天大多都會開着暖氣過夜，但長期開住暖風機會影響室內濕度，危險之餘又會令皮膚乾燥，而且香港地寸金尺土，睡房面積一百呎都唔夠，意大利DeLonghi呢部外形纖巧的座枱式充油爐，體積比普通暖爐細一倍。此機雖然只有5塊發熱片，但由於採用了圓滑邊位設計，令接觸面大大增加，能發放出500Watt的熱力，適用於一般50-60呎的睡房，耐熱塑膠外殼亦不易燙傷，同時並具備大型充油爐的功能，可以安心放在BB房使用。
型號：TRN500
尺寸：33.5cm闊×16cm深×38.2cm高
發熱片：5
熱量：500Watt
售價：$390(吉之島)
大多充油式暖爐在開啟後需要待30分鐘才開始令室溫上升，但呢部DeLonghi製造的即暖型充油爐，便針對充油爐的弊病，採用獲世界專利的即暖設計，只消按下即暖掣，其內置的發熱管便會即時啟動，加快室溫上升的速度，再配合空氣底入面出的煙囪式設計，使散熱導管得以在最快時間散發熱力。此機另一特點是每塊發熱片均採用圓滑邊位設計，發熱片比同類型機種少，但傳熱面積卻更大更廣，令散熱效能比傳統充油爐高出106%，減低耗電量。
型號：G010920R
尺寸：56cm闊×24.6cm深×64.5cm高
發熱片：9
熱量：2000Watt
售價：$1,698(UNY)
本地普及的小家電一律以灰白兩色為主調，歐洲機則着重機身的花款，好似呢部同是DeLonghi的防水氣浴室暖爐仔，面層鋪有閃亮的銀色鉻面(Chrome)，加埋流線型設計，無傳統暖爐咁單調，同時亦具備恒溫裝置、溫度調校及防霜功能，以後冬天沖涼都唔怕凍親啦！
型號：HVM02
尺寸：21cm闊×14cm深×30cm高
熱量調校：1000Watt及2000Watt
售價：$448(吉之島)
以風扇同冷氣起家的美的，今年開始大肆踏足暖氣市場，更以一招鬥平來頂爛市，一部2000W充油爐唔使$400，比同類機種平足一半有多，單是售價已經有睇頭，而且功能上此機也不遜於其他牌子，同樣有自動控溫、火力調校等，要求不高也可一用。
型號：NY20EA-9L
尺寸：48cm闊×16cm深×69cm高
發熱片：9
熱量：2000Watt
售價：$399(中原)
同樣屬於經濟之選的伊瑪牌暖風機，底部可以作左右搖擺，出風口夠晒大，令送風角度更加廣闊，兼備有溫度調節掣及傾倒安全裝置，遇上機身翻側或過熱的情況，電源便會自動切斷，放在老人家的睡房倍感安全。
型號：1FH-20105
尺寸：23cm闊×27cm深×35cm高
熱量調校：1000Watt及2000Watt
售價：$368(中原)
市面上有咁多種新舊款暖爐，除價錢同牌子，買暖爐其實重需要考慮啲乜呢？𠵱家就等Kenwood助理營業經理PatrickLaw向大家傳授幾招揀爐心得：
──由Watt數入手
電暖爐所發出的熱能，需要同房間的面積配合，一般來講，每平方呎需要10Watt熱能，例如一間面積200呎的房間，便需要選購一個有2000Watt的暖爐。
──由爐款入手
唔同的機款都有唔同的特性，暖風機體積細細，方便移動，不過覆蓋範圍較細，熱量較為集中，適合於固定位置工作的人；輻射式暖爐利用金屬面將發熱管的熱量輻射至空間，能迅速提供熱力，不過爐面溫度較高，適合空間較大的辦公室；充油式暖爐開啟初段熱力上升得較慢，但無暖風機所發的熱能咁乾燥，最適合有小朋友或長者的家庭。
──由用途入手
揀機款需要視乎放喺邊個位置，例如想安裝在浴室，最好揀備有防水和防濺水設計，又或者可掛牆的暖爐，若想放在小朋友的睡房，最好揀爐面溫度較低的充油式暖爐。
用爐小貼士：
1.擺放時必須與家具雜物保持50cm距離。
2.電暖爐屬耗電量較高的家電，必須獨立使用一個插頭，以及避免使用拖板和萬能插蘇。
3.為保持空氣流通，可將窗戶或門戶留少許隙縫。
4.避免將暖爐放在走廊或通道附近，以免不小心踢翻。
5.暖風機的使用時間以少於4小時為佳，充油爐雖然可以開過夜，但亦不能超過20小時。
店舖資料
中原電器
地址：將軍澳新都城2期UG34-35店
電話：31943330
太平家庭電器
地址：尖沙嘴海洋中心商場302室
電話：27306747
吉之島
地址：鰂魚涌康山道2號康怡廣場
電話：28846888
UNY
地址：太古城中心第二期
電話：28850331