華創（291）上周因為第3季業績唔理想，由8元嗰頭散落嚟，最低見7.10元。上周二至四，沽壓好勁，平均每日有22.3球，上周五同昨日，縮到每日得5球幾，代表沽壓已去，股價恢復正常，昨收7.40元，升0.10元。
華創第3季成績唔理想，只係因為地產收益減少，其他核心業務冇走樣。華創由邊個價位跌落嚟，有機會上番邊個價位，短期內上望8元。華創Call輪9270，跟正股散落嚟，大量成交，近期每日有四五千萬份易手，炒得過。睇番數據，現價14.6仙，雖然5.1倍槓桿率唔算爆炸，但明年9月至夠鐘，大把時間，而咁長壽嘅溢價亦只係7%，入於抵買個隻。正股上番8字頭，9270見20仙。
中銀（2388）如同老僧入定，企住8.30元，但有啲中銀Call輪郁郁吓，例如9462升3.7%，9459升3.9%，但隻9458則微跌1.3%。9459唔算冷門輪，有5球易手，價值百一萬銀，啱搏殺型炒家埋手，明年2月夠鐘，現價22.7仙，溢價10.1%，槓桿率37倍，正股一旦郁三兩毫，隻輪隨時升五六成。
上周六所提嘅恒地Call輪9473，單日升幅13%，炒即市者已可收割。細細注，博好分，可以諗吓新世界Call輪9474，有5個幾月壽命，現價28仙，溢價18.3%，槓桿率有成17倍，好夠爆炸力。
章盛