根據城市大學管理系所做的一項調查發現，下屬對上司最不滿的通病，排行首位的是「要求過高」。不知道要求過高跟工作能力過低是否有直接聯繫，但將要求過高當作一項上司通病實在有值得討論的餘地。
打工生涯中，服侍過好幾位老細，絕大部份都是要求高的人，那些要求低或者是冇要求的老細，通常晨早就俾我炒咗魷魚，因為要求低即係冇嘢學，自己亦冇得發揮，橫豎都係𢭃一份人工，梗係希望有錢搵又有嘢學。
要求過高其實真係冇乜問題，只要凡事盡力而為，除非老細無端端要你飛畀佢睇，否則老細要求有幾高，下屬就應該盡力做到有幾好。
之不過要求高嘅老細們也起碼要懂得要求，即係知道夥計嘅能力與質素，最重要嘅係知道想達至邊一個結果。有啲腦細嘅老細，根本係茂利一名，根本唔知想點，亦唔知道件事出嚟會係點，盲目地亂指一通，亂咁要求一通，打着呢種老細工，確係唔好彩，惟有唱句為「兩餐乜都肯制，前世」。若然閣下嘅老細有要求、懂要求，知人善用，對打工仔嚟講係一件好好嘅事，因為跟着呢種老細，應該好多嘢學。
尤其係後生仔，千祈唔好以一句老細要求過高做藉口就放軟手腳，老細其實袋錢入你袋都唔知。有要求係好事，盲目要求是戇居事，就像打邊爐跟打屎忽一樣，差少少就差好遠。