郭富城（城城）鍾意靚車之餘，重好識飲識食，好似前晚八點鐘，佢揸住部平治跑車同一位男性朋友去跑馬地搵食，結果去咗景光街著名食肆喜慶坊食晚飯，重一口氣點咗兩味以花膠為主嘅餸菜，包括六百六十八蚊嘅花膠至尊煲，同每位一百六十八蚊嘅花膠扣鵝掌，加埋二百二十蚊嘅古法羊腩煲。
花膠含有豐富蛋白質，有滋陰養血、固腎培精功效，對肺腎虛弱同貧血都好有幫助，郭富城今次都算識歎囉，不過因住補得滯流鼻血喎。
記得年前城城揸部二百幾萬嘅保時捷跑車去喜慶坊食飯，點知俾差人抄牌，但城城為咗食飯一於少理，可見佢幾咁重視飲飲食食。
另外，馮仁昭前晚亦喺銅鑼灣撞見李燦森同佢個模特兒女友Carrie拍拖行街街，佢哋好鬼甜蜜，重一邊行一邊windowshopping，其間李燦森女友重小鳥依人咁蹺實男朋友隻手，真係羨慕死人。
謝偉俊噚日喺中環主持第五間律師行分行開幕儀式，重特登搞巴士巡遊慶祝吓，佢話本來安排咗個性感女郎撐場，重諗住搵秘書扮，但係秘書試完件superwoman衫之後即時耍手兼擰頭，死都唔肯着！點知有人自告奮勇話要扮superwoman，不過即時俾謝偉俊拒絕，佢重話：「都幾十歲人，已經花甲老嫗，端莊啲啦，唔好搞笑嘞！」估唔估到係邊個呀！咪就係白韻琴囉！
吳啟華同蒙嘉慧（YoYo）噚日喺布袋澳村拍電影《西貢的童話》，由於YoYo扮水上人家，住喺隻艇度，所以佢哋每次拍戲都要靠街渡接駁，不過YoYo已經非常熟手，佢最驚反而係要拍劏魚戲，因為咁大個女都未劏過魚。
陳煒噚日喺亞視出席十一月份藝員生日會，重收咗總裁派嘅二百蚊利是。問到陳煒嘅生日願望，佢話：「我希望日日有工做，年年有工開。」陳煒喺上星期四二十九歲生日，重同一大班朋友慶祝，佢話：「嗰晚食蟹宴，啲朋友重送咗玉牛同衫畀我。」
周杰倫日前喺新加坡，擔住《公益大聯盟》節目嘉賓，重出席當地嘅演唱會，不過喺記者會入面，周杰倫行路拐吓拐吓，原來佢有遺傳性脊椎炎，二十歲開始一坐飛機臀部就會痛。另外，台灣藝人羅志祥最近幫周杰倫出咗本書，大爆佢夜晚怕一個人瞓，又怕老鼠同曱甴，周杰倫話：「我是不敢，一個人睡是很無聊，會開電視一直到天亮。」