常聽深圳通講，東門是香港的旺角，心諗：「東門真係咁正？唔去真係唔得？」當我上星期首次踏足東門，第一印象是人頭湧湧，墟冚程度真的和旺角不遑多讓。不過論貨色就有點娘，正在失望之際，發覺一個剛翻新的T.O.T時尚廣場，場內所售賣的衣飾，完全符合香港年輕人的口味，感覺就像香港旺角的潮流特區！
記者：歐嘉荃
攝影：Manny、陳良
ImageGirl：小慧
站在這間店舖的櫥窗前，環顧其裝修及貨品，我就認定內裏全是香港貨！見到店內的老闆娘Winnie後，發覺原來又是一位北上創業的年輕小伙子。曾從事平面設計的Winnie，與另外兩位香港朋友一直也有創業的念頭，奈何香港的舖租太貴，碰巧聽人講深圳的消費力不弱，遂與朋友博一鋪，夾咗九萬蚊，將創業基地轉移，滿懷大志地希望提升深圳人的生活品味
Esther話上個星期買咗呢款透明杯墊，朋友見到之後好鍾意，所以今次特登再入貨送畀朋友。杯墊入面啲水郁吓郁吓，墊上更印有青蛙、金魚圖案，非常過癮！不過Esther最鍾意的，還是附送的編織杯墊套，用嚟送畀朋友一啲都唔失禮。
舖內另一過癮精品就係呢個透明的吹氣咕𠱸，咕𠱸內放了Winnie精心設計的染色乾草和一條幸運魚，雖然攬上身唔算軟腍腍，不過勝在夠特別，唔攬當家居擺設都得。
全店最受歡迎的，就是呢個幸運魚音樂座，座上的魚由竹葉製成，Winnie話：「幸運魚由泰國製造，泰國和尚往往在竹片上寫了祝福語句，然後就送畀信眾，所以泰國人視竹葉為吉祥物。桃紅色代表愛情、橙色則代表健康。」
第3世界
地址：東門步行街T.O.T時尚廣場2樓D218店
營業時間：12:30pm-8:00pm
喺深圳經常會見到很多店舖賣外貿貨，其實外貿貨即係香港嘅出入口貨，就好似呢間時裝店，便以售賣stussy、CK、Diesel的外貿貨為主。
熟客張小姐平均每星期都到這裏買衫，「今次睇中呢件stussy衞衣，點解鍾意？因為牌子夠晒出名，而且質料舒適。」
「啱啱喺澳洲返嚟放假，朋友話我知呢度有外貿貨賣，咪專登嚟買囉，啲貨都OK，雖然款式同Size唔係咁齊，我今次揀咗Yak-Pak夾棉衞衣！」
這頂stussy皮帽，帽邊綑上同色的冷作配襯，夠晒Cool。本來有5種顏色，𠵱家剩番黑色，要買就要快手。
BananaStation
地址：東門步行街T.O.T時尚廣場2樓D215店
營業時間：12:00noon-8:00pm
場內另一間專賣模型的店舖，在星期六見到只有約50呎的舖內，站滿五、六位模型迷，才知這店已成為深圳模型迷的聚腳點。
呢兩副由上海威龍廠推出的模型，兩者均為德國的二戰坦克車，舖內的模型迷說：「上面那副是重裝甲的機動炮兵車，屬於二戰中期的坦克，而下面那部是德國步兵的代表，屬於支援車輛。」
文化幹線
地址：東門步行街T.O.T時尚廣場2樓D230店
營業時間：星期六及日1:00pm-8:00pm