前排參加午餐會，聽新力總裁安藤國威演講，啱啱坐響獵頭M隔籬，獵頭M間公司係世界名牌，唔係香港本地中小企，所以生意唔憂做。獵頭M話：「唔好以為市道唔好呀，我哋業務夠分散，其他亞洲國家經濟好轉，所以重一樣係好忙。」左丁山即刻問佢投資銀行會唔會請人，佢眼仔睩睩話：「呢個範圍暫時係『急症室』，幾難搵，唔好預我。」
前日碰到高官P，佢竟然拎張CV（履歷表）畀左丁山，嚇咗我一跳，以為佢要換工。高官P話：「係幫啲師弟搵工，佢辭咗份AO唔做，去咗外國名校讀MBA，考到優異成績，為人好叻仔，但畢業返嚟幾個月咯，重未搵到工，你幫吓手得唔得。」高官P真好人，居然幫師弟搵工，唉，如果早知會係咁，佢師弟就唔會去讀MBA啦，做AO印印腳都唔知幾好。
高官P話：「你唔好以為做AO就印印腳，啲初級AO都唔知做得幾辛苦，晚晚八九點放工，閒過立秋。呢位師弟好好學，力求上進，辭工唔做政務官去讀書，係真正嘅自我增值，抵讚到極。」高官P講得幾啱，左丁山收過張CV，立即轉送獵頭M，希望可以做個媒人啦。
高官P又話政府啲高級位，「人亡位失」，即係話老細退咗休，佢個位就跟住取消，下面嘅助手冇得升上去，所以唔少D3級官員感到心淡，出面一有好機會就想散band。照計四十幾歲人退休，攞番退休金四至五萬銀一個月，再搵到一份十零萬或者八九萬嘅工，一樣好妥當，唔走就笨。