港股連續10個交易日上升，恒指噚日再升35點，收報10100，不過成交只得48.4億元。有芬佬話，現時要開始做櫥窗粉飾，但擔心美國隨時出兵攻打伊拉克，令到美股及港股大幅回落，所以一邊托高股價，一邊開期指淡倉買保險。
美國傳出滙豐（005）收購Household可能失敗，搞到滙豐出現回吐壓力，但噚日股價仍企於90元以上。其實，滙豐今次收購能否成功，主要睇收購價是否理想，只要滙豐股價企硬，交易一定成功。不過交易成功後，大家反而要留意Household股東所持嘅滙豐新股，會否即時在市場沽出。
二三線股噚日表現唔錯，其中和記港陸（715）突然大升8.1%，收0.67元，成交大增至7445萬元。據黑客話，市場傳隻股會獲和黃（013）注資，不過暫時未收到風幾時會落實。不過，有班炒家趁近日市況回升，所以搵隻有名氣嘅二三線股炒吓，目標價暫定為1元。
恒發（097）連日來股價企於7.40元水平，高於恒地（012）提出之私有化價格7.35元。Cookie話，外界估恒發每股資產淨值12元，即係話收購價較每股資產淨值折讓38.75%，令唔少投資者博恒地可能調高私有化收購價。假設將收購價折讓幅度稍為收窄至30%，收購價便要提高至8.30元。換言之，現價入市可博到唔錯回報。
不過，若四叔唔肯提高收購價，私有化建議最終被其他股東如鄧普頓基金等成功反對，恒發股價就可能跌回5.95元水平。因此，買入恒發嘅值搏率其實唔太高。但據聞恒地已經同基金股東傾緊，調高收購價嘅機會亦唔低。
阿虎