𠵱家嘅新盤，不論規模大小，發展商都會搭建示範單位，目的係吸引多啲人去睇，帶旺個場。但準買家好少會諗住買示範單位。
不過，華懋集團沙田碧濤花園示範單位，就有買家情有獨鍾。
中原陳世民話，個客購買碧濤二期怡景閣2樓C，有河景嘅示範單位，千六方呎，購入價五百萬，每呎要三千一百幾蚊，但扣番價值五十萬嘅裝修，呎價只係二千八蚊，比河景單位市價每呎三千零蚊為低。
呢個示範單位有酒吧櫃，重間埋工人房，啱晒個客要求，而且家具齊全，買家下個月尾收樓，行入去就住得。陳世民透露，個客傾咗兩個禮拜至落實入市。
聽講個示範單位用咗兩年，係發展商促銷呢座時搭建嘅，其後促銷隔籬座美都閣，就封咗盤。最近重售怡景閣，再執靚個示範單位，點知就畀人買咗。
若果重有買家對碧濤花園示範單位有興趣，就只得美都閣可以揀，因為發展商唔會再喺怡景閣搭新示範單位。
樓市興旺時，買家要排長龍兼要出盡法寶，先可以買到心頭好，𠵱家唔使咁辛苦，重有好多人爭住送禮畀你。
李生李太以一百三十萬買咗屯門愛琴海岸五座中層H室，六百三十五呎，每呎二千零蚊。佢哋第一次買樓，除咗買到心水單位外，重得到代理送贈標緻206汽車一部、汽油一噸同物業釐印費，發展商亦送出一個車位，總值共50萬，點解咁着數？因為佢哋係頭籌買家，體驗咗「行得快，好世界」呢句話。
下個月就係聖誕節，商場都忙於布置，安排慶祝活動，吸引市民消費。太古地產王牌商場之一鰂魚涌太古城，今個聖誕就同香港協康會，合辦「愛心玩具捐贈行動」。由今個禮拜五開始，至12月22日，逢禮拜五至日，會喺太古城中心第三座寫字樓大堂擺放收集箱。
收集到嘅玩具，會喺23日轉交香港協康會，再送畀有需要嘅兒童。捐贈玩具除咗有意義之外，捐贈者重可以得到玩具購物優惠券。
由互聯網專業人員協會首次主辦嘅「無障礙優異網站」大獎，共設71個獎項，結果富城集團富城網，參賽的46個網站全部獲獎，認真厲害。
聽講呢個比賽基本要求係視障人士都可以用到，視障人士喺電腦加入聲效卡，而網站又提供相關軟件，便可以收聽到網頁嘅資訊。
富城董事總經理鄭錦華話，預計未來一兩年，集團管理嘅屋苑，全部都有獨立網站，視障人士都用得。佢重話，咁樣可以提升智能家居生活質素，同迎合大勢發展。富城管理嘅屋苑共有三百幾個。
近期密密吹風嘅上環帝后華庭，發展商講到好似有好多投資者同炒家會飛身入市咁樣。呢個盤係官方機構市建局有份，所以好驚俾人鬧明益炒家，製造炒風。但佢哋所謂減低炒作措施，只不過係同一間公司最多可入5張票，同只可揀一個單位。但又唔限制公司簽正式合約前或入伙前唔准轉董事，或者喺簽正式合約前唔准sub-sale等。
以前樓市炒風最熾熱時，發展商限制一家公司只准入一張票，兼只可揀一個單位。𠵱家居然可以入5張票。除非帝后華庭嘅定價完全冇水位，否則發展商嘅言論，變相係叫啲炒家快啲入票。
嘉里大埔滌濤山，可以用廠家大本營嚟形容，因為啱啱又有一單廠家入市個案。美聯助理營業董事鄧天勇話，廠家用3180萬掃咗兩座洋房，一個自住，一個收租。入市原因係近排樓市氣氛好咗。
廠家睇過滌濤山幾次，重搵風水師睇完至落槌，用千八萬買咗55號A型洋房，接近四千方呎，連二千八呎花園；又以約千四萬買入27號B型屋，三千二百幾呎，連二千五百呎花園。廠家會住個大單位，細嘅就收租。美聯跟咗呢個客成一年。聽講呢個廠家住緊九龍塘二千幾呎分層豪宅。
滌濤山今個月已有22宗成交，上個月只得7宗。
蘭西
電郵地址：