財爺阿松上星期六下晝由阿姆斯特丹飛到倫敦，準備拜會英國嘅財金界人士，但係由於啱啱撞正星期六、日，阿松喺倫敦好似人間蒸發一樣，去咗邊都唔知。
佢嘅新聞主任譚志源話，呢兩日係阿松嘅privatetime喎，所以佢做咗乜嘢同住係邊間酒店，都話係秘密喎！
八方有同事想喺倫敦聯絡佢，只不過想知道佢喺邊間酒店落腳啫，點知問極都係問唔到，淨係肯講住喺海德公園嗰頭，嘩！嗰度咁大，唔知重以為我地財神爺為咗同政府慳錢，搞到要瞓公園，終於噚日阿松「放完假」，先肯講住喺文華東方。
咁都未算離譜，八方同事想採訪佢一個早餐會，竟然連門牌地址都畀唔到，要記者自己上網搵。八方同個議員講開，佢哋都好奇怪為乜要咁封閉，重話想喺立會整條質詢，問吓阿松有乜咁機密，唔知佢到時敢唔敢唔答呢？
（圖）阿松喺倫敦CalvaryandGuardsClub開早餐會，記者終於等到佢老哥出現。
傳真︰2623-9278
電郵︰