前晚Cookies、Shine同麥浚龍等喺九龍灣展貿出席新城搞嘅「知識造電台人Show」。平時聽Cookies唱歌，九個女仔一人一句都唔知邊個唱得，邊個唔唱得，加上佢哋跳嚟跳去，都分散晒注意力啦！
不過隊長Stephy最近為新戲《九個女仔一隻鬼》獨唱咗首主題曲《不要離我太遠》。佢前晚首次單人匹馬演出，點知緊張到成個企喺台度硬晒，流晒汗咁，不過，佢都平平穩穩咁唱完晒成首歌，都算飲得杯落。
Stephy落台後仍然驚魂未定，接受訪問時有人問佢首歌叫乜名，佢竟然以為人哋問佢叫乜名，於是就大聲答：「Stephy！」搞到哄堂大笑。Stephy話佢一個人企喺台度都唔知望邊度好，加上出場前其他成員都同佢講加油，幫佢打氣，搞到佢重緊張，好彩演出都算滿意啦！
Cookies前晚得番八個成員，皆因Serena整親條尾龍骨，所以要留喺屋企休息。另外，麥浚龍前晚喺台上大打觔斗搶鏡，重攬女舞蹈員跳舞，豔福無邊！
顏穎思噚日喺尖沙嘴出席宣傳活動，近日盛傳佢所簽嘅經理人公司旗下有好多藝人都冇嘢做，唔知顏穎思有冇諗住跳槽呢？佢話：「我同公司嘅合約去到年尾，如果續約梗係希望有多啲嘢做啦，公司之前都有同我傾過續約問題，𠵱家都未定㗎，但如果發展得唔如意，我都可以去讀書。」
成龍噚日應邀去咗啱啱嚟香港訪問嘅美國驅逐艦參觀。成龍由船長帶住佢周圍行，佢重幫啲船員逐個簽名影相。另外，成龍部《火拼時速》第三集預計會喺後年上畫，而部戲個導演畢維納（BrettRatner）重話會搵呢排新聞多多嘅米高積遜（MichaelJackson）做入面一個幾重要嘅角色。
梅小惠噚日喺銅鑼灣世貿中心為佢嗰本著作《和小惠上床》做宣傳，佢重特別喺台上放咗一張大床，佢重請嚟十三年嘅好友阮兆祥撐場！早前有雜誌寫小惠同祥仔友誼決裂，噚日佢哋就異口同聲否認有呢件事，不過講到喺十三年友誼裏面有冇試過鬧交，佢哋就唔多夾口供，小惠就強調從來都冇鬧過交，而祥仔就話有試過鬧交，似乎佢哋嘅友情唔係外間睇得咁好！
陳彥行同鄧兆尊呢對緋聞男女，雖然成日俾人影到一齊去街街，但佢哋一直冇承認過拍拖。噚日佢哋去銅鑼灣幫梅小惠嘅新書撐場，兩個人一齊上台自然又俾人攞嚟玩，當梅小惠要兆尊用一張床形容行姐時，兆尊好坦白咁以「碧波上嘅浮床」嚟形容行姐，真係服咗佢。
郭富城做咗「救護之星」，幫消防局推廣防火同救護服務。佢噚日去尖沙嘴出席頒贈紀念品儀式。城城話佢以前都有諗過做消防員，因為覺得消防員好型喎，但最後要幫老竇做生意，所以冇投考到。城城話：「所以我今次做咗『救護之星』都幾好，可以接觸到消防嘅嘢，感覺好似做咗消防員咁！」