周日跑馬，巫斯義發威殺足四場，捧埋「其士盃」。可惜八方飛晒佢，結果不問可知。冇錢收惟有四圍「八」，問吓主席夏佳理點解唔嚟頒獎，要搵陳祖澤代；又問吓點解唔見新董事許仕仁，想同佢講吓「皇仁仔」嘅古仔都見唔到人。
許仕仁及鄺其志先後引退，皇仁仔仕途失意，但馬場得意。馬友話，皇仁班舊生，一共有三個團體抽到馬，其中「皇仁賽馬團體」隻馬已改咗名叫「皇仁之光」，係五十二分之南半球馬，養在希斯馬房。馬主包括馮載祥、林中麟、許仕仁等十一人。另一隻編號C182之南半球馬則屬於「皇仁精神團體」，經理人係區啟光、陳榮裕、何君堯，亦養在希斯馬房。至於林中麟、許仕仁亦有份之「皇仁舊生賽馬團體」則明年才有馬，經理人為陳永燊、秦肇陽、黃嘉謀。
講開老許，馬友話，呢位在皇仁奉旨考第一之「橋王」，早決定劈炮，離開強積金管理局。佢本來一早遞辭職信，但碰正馬會選董事。由於馬會素來不喜歡「新聞人物」，於是老許收埋封信，等選到做董事先再遞，的確計劃周詳。
傳真︰2623-9278
電郵︰