上周末小初又上中山打波，例牌又撞到成班大經紀，小初問佢哋有乜新搞作，佢哋提起光大科技（256），並話光控（165）將佢賣殼一事，幾乎已成定局。
光科近排股價表現確係靚，在個多月內由20仙水平，升到上最高33仙，上周五則平收32仙。
光大系自從前老總朱小華被拉之後，據講新老總直到今時今日，仍然在收拾殘局之中，但步伐似乎好慢，至今除咗出售香港建設（190）外，都唔覺有其他動作，所以話光科賣殼，小初基本上唔覺得出奇。
光科在10月中時，開始回購股份，重日日係咁收，股價愈買愈貴。小初開初重以為，光科股價上揚，係受到回購股份所影響，若係賣殼嘅話，點解又會搞呢類動作？
大經紀解釋，光科內部仍有唔少現金，將之用作回購股份，可以支持股價，同人傾賣盤時，除咗容易傾外，重可以增強議價能力。
慕容小初