世界性Game壇盛事主要有兩個，日本有東京遊戲展，歐美就梗係洛杉磯嘅E3！講到香港，最叻都係搞咗兩年嘅PS2EXPO。不過今年GameShow（12月21至26日）就熱鬧得多，唔止得PS2唱獨腳戲，重有東南亞多間大廠加入，大會更搵嚟亞洲天后Sammi做代言人，以其3D造型《神奇女俠》作為大會主題曲，實行真假Sammi現身齊幫拖。
記者、攝影：徐影龍
好厲害！連我自己都分唔到係真相定係CG，香港電腦科技拍得住荷李活！
今次亞洲遊戲展以Sammi嘅《神奇女俠》為大會主題曲，MTV內Sammi更以多個3D扮相出現，負責操刀嘅係先濤數碼，以最先進CyberScan技術掃描Sammi面形及表情，再配合MotionCapture擷取動作，令3DSammi表現活靈活現。
今次亞洲GameShow拉攏香港多個遊戲代理參加，包括PS2、EA、SNK及一眾PCGame製作商，展覽場地定為灣仔會展，佔地比過往PS2EXPO更大，同場展出世界各地新款勁Game，供入場人士試玩，加上PS2更由日本請嚟一班專業ShowGirl到港，當然唔少得GameShow必備嘅Cosplay角色扮演，更由亞洲天后Sammi擔當代言人及以全CG製作嘅《神奇女俠》作為大會主題曲，可謂搞作多多，誓要跟日本嘅東京GameShow看齊！
除新Game試玩外，大會亦舉辦一個「打出個未來」活動，畀年輕機迷設計出各款別出心裁嘅原創Game。星期六（23/11）揭幕禮上，兩個組別「學生組」及公開形式嘅「我要Go飛」組已分別亮相，當中大部份都好有創意，有啲OnlineGame更已推出市面，成功運作超過一年。到亞洲遊戲展當日，更會開放供入場人士試玩。
隨住PS2同XBOX將有大量中文Game出籠，亞洲市場已漸被重視，而PS2更於亞洲遊戲展一口氣展出六款中文化新Game㖭。
4年前以骰仔玩法嘅智力型《XI》推出後，以其簡單刺激玩法大受歡迎，今次新版載譽歸來，加入炸彈引爆系統，令連鎖效果更豐富，絕對屬聖誕PartyGame。
終於有日本RPG嘅中文版本出現，Namco呢隻《TOD2》更屬名牌中嘅名牌；今集大幅提升戰鬥時嘅連技要求，機迷有好高期待度，日本版28/11見街，中文版12月極速見街。
《WarriorInArgus》屬動作型遊戲，主角以貌似中國血滴子嘅武器過關斬將，場景大部份建築物均可破壞。
亦屬媾女Game中名牌之作，中文化後令機迷更明白劇情及女主角性格，要𠝹齊眾多靚女主角更得心應手。
食正電影上畫熱潮推出，遊戲以哈利波特重返魔法學院展開第二學期生涯為主，除英文版外，重同時跨平台喺PS2及XBOX上推出中文版。
《魔戒2》較早前已登陸香港，不過喺亞洲遊戲展內都會亮相畀機迷試玩，Game內同時設有中、英文語言選擇。遊戲為動作型，三個主角均有唔同嘅能力同武器，而PS2版更獨有16個任務場景。