「女人揸的士有三大着數，多客、多貼士、少俾客鬧。不過有辣有唔辣，比起男司機，我哋驚多三樣嘢，驚鹹濕佬、驚鬼、驚每個月都嚟探我一次嘅Auntie。」說這番話的是差點有藍潔瑛般省鏡的女的士司機Apple，專做夜更，咁勇？沒辦法，沒人養，惟有自食其力。
記者：陳彩記
攝影：Alex
小檔案
姓名：Apple（35歲）
小資料：1年全職夜更的士司機，堅持路在口邊，永不看街道圖。
交更，接過記者，一手軚泊好的士，剛睡醒的Apple慢條斯理打開車門，邊打着呵欠邊大喊：「老例，餐蛋麫。」這裏是的士司機們聚頭小休的落腳處，士多老闆很風趣：「今日肚唔肚餓？餓就醒多隻Egg畀你Eat！」
「女人就有呢度好，乜都有着數。」說得沒錯，忘記扣安全帶，不下一次給交通警逮個正着的她，次次只吃口頭警告：「換着男的士司機？嗰更白做都得嘞。」追問還有何着數，她掩嘴笑說：「我比男的士司機更易上客，因為我靚嘛……講笑啫！實情係因為我係女人，對乘客嚟講有份新鮮感，好多客未見過女人揸的士，想見識吓我手車掂唔掂，又或者覺得坐我的士會安全啲，佢哋估女人係穩陣派，開車唔會咁狼死。就擒日之嘛，中文大學正門，兩架的士一前一後埋位，個大學生前面架車唔上，特登行多兩步上我架車，重要係出大圍火車站，大旗呀！」
Apple最怕看地圖，車箱裏也沒有的士司機必備的街道圖，經常行錯路兜錯圈。認不得路，只有一個解決方法：「路在口邊，我唔怕醜㗎！先叫個客幫手帶路，都唔掂嘅話，Call上台，搵行家指點迷津。」
最經典，莫如這一役：「有對拖友，大埔落旗去機場，我唔識路，死撐，諗住跟路牌行無死，點知兜咗入青衣機鐵附近，唔識得兜返出嚟，去到公路分叉位，撐無可撐，惟有同佢哋SaySorry，之後泊埋一邊，打死火燈，即刻打畀啲行家，講極我都唔明，惟有一邊聽住Handfree一邊揸車，足足阻咗人十幾分鐘，好彩佢哋夠Nice，我話收少廿皮，佢哋堅持跟咪表畀錢，臨走重畀貼士㖭！」
說到貼士，她又洋洋得意：「收過最重手嘅貼士，四嚿水加一餐豐富海鮮宴！」話說街客上車，地點西貢，乘客上車後才向Apple提議包車，來回兩程$500：「一晚都未必搵到五嚿水，梗笑住應承。」泊好車，乘客問她是否吃過晚飯，她說不：「佢哋話與其要我坐喺的士等，不如請埋我食海鮮，又蝦又蟹又石斑，重叫我發辦點菜㖭……我計過，兩程加埋都唔使$100，只阻我粒零鐘開工時間，重唔係四嚿水貼士？」
說過去，時間推回一年前。
話說失婚的Apple積蓄差不多用盡，每天睡至日上三竿，吃過午飯就幹活，所謂的幹活，是搓麻雀。「我小女人心態，結咗婚就應該唔使做嘢，等老公養，但好唔好彩我離婚喎，我唔想做嘢，所以日日攻打四方城，目標唔多，贏一百幾十夠每日生活費就得嘞。」世上沒不勞而穫的事，她也不例外：「以賭為生，唔Work，賭得有壓力，長賭長輸，老本差唔多食盡，死死哋氣搵工。」
找工作，又講學歷又講工作經驗，Apple瓣瓣無。「我中三程度，又無乜工作經驗，針拮到肉唔知痛，𠵱家真係知道乜嘢叫搵食艱難。」彷徨兩個月，終找到份茶餐廳樓面，死熬兩個月，受不了氣，辭職。「一日12個鐘，一個月2日假，$6,000唔夠，我勤力又話我唔知博乜，我懶又話我唔做嘢，頂唔順班同事玩排擠，唔撈囉！」
碰巧有朋友是的士司機，建議她入行，她不用考慮，立即點頭：「揸的士，自己生意，唔使受氣，我一做就決定做全職夜更。」首日開工，租車錢也蝕了：「有客都唔敢接，驚自己唔識路，得失人！」只好全日遊車河，「臨急抱佛腳，好歹都做番一日功課，盡量認多啲路，認得幾多得幾多。」不過她依然不看街道圖。
第二日，她懷着戰戰兢兢的心情，如常出車，那「暫停載客」的紙牌，依舊放在咪表上。
「兜吓兜，兜到去翠屏花園，埋的士站，諗住扯飛煙，有個女仔想搭的士，用好疑惑的眼光望住我，重問我係咪司機，載唔載客。」不知哪裏來的勇氣，Apple一手扯下「暫停載客」紙牌，隨即開車門，心狂跳，因害怕自己認不得路，直至那女乘客說出目的地，她才舒口氣。
「佢話要去體育學院，我個心定晒，因為噚日我去過，我識去……到咗體院，我個心又狂跳，終於開齋嘞，做得成第一單生意，差啲唔記得收錢。」一年已過，現在Apple專做大埔區，認得新界各區十分九道路，不過大約每三日，總有一次行錯路。