年尾樂壇頒獎禮在即，各大唱片公司均忙為旗下歌手攞獎而鋪路，當中尤以英皇歌手最落力，容祖兒、陳奕迅及Twins近月頻頻為無綫配音做騷，而容祖兒更會在明年一月主演新劇《天使愛美麗》演公關小姐，拍劇換獎的傳言甚囂塵上。
英皇歌手近期不斷為無綫效力，陳奕迅（Eason）和Twins早前已分別為無綫劇集《衝上雲霄》擔任串星，之後英皇歌手亦曾為無綫演出不少節目。
容祖兒（Joey）和Eason日前更罕有地為明珠台購入的西片《鐵達尼號》配音。而下月七日無綫為東華製作慈善騷，英皇以三周年演唱會做包裝，安排全體歌手晒冷出擊，已顯見英皇對無綫十分畀面。
由於年尾舉行樂壇頒獎禮在即，英皇歌手為無綫如此「勤奮」工作，難免引起敏感揣測。當中尤以Joey和Eason為《鐵》片配音更是瓜田李下，雖然Eason曾言並非為無綫幫手，配音只為賺錢，但二人花了三日時間配音，無綫卻如常以歌星騷計算人工，兩人各獲三個騷薪酬，僅得約二千元。
除配音外，Joey將於明年一月主演由潘嘉德監製之二十集無綫時裝喜劇《天使愛美麗》（暫名），她在劇中將扮演一名在公關公司工作的公關小姐，故事圍繞她由醜小鴨變天鵝的搞笑過程，而男角人選尚未落實。Joey繼演出《新鮮人》一劇後，事隔兩年，在年尾這段敏感日子中再接新劇，拍劇換獎的傳言自然甚囂塵上。
無綫戲劇科助理總監梁家樹，昨日接受本報電話訪問時則說：「Joey係會接呢套劇，套戲係喜劇，講佢要靚，以外表吸引人。我哋搵佢係因為佢耐冇拍劇，有新鮮感。」問到會否擔心惹來拍劇換獎之說，梁家樹即強調：「我哋喺年中已經傾拍劇，唔會有呢啲嘢（換獎）。」
容祖兒：為明珠台《鐵達尼號》配音、明年一月拍電視劇《天使愛美麗》
陳奕迅：客串演出劇集《衝上雲霄》、為明珠台《鐵達尼號》配音
Twins：客串演出劇集《衝上雲霄》、拍攝《麗星郵輪群星海陸暢遊SuperFun》、拍攝番禺旅遊特輯《紅星動物日夜玩不停》