利時潮流店開倉，型仔型女蜂擁而上，薯仔薯妹望門輕歎：「唔識襯衫，無從入手。」唏，做人點可以咁無自信，潮流翻來覆去只得幾幅被，誰說薯仔生下來不可當主角？只要有高手過料，變身為型人話咁易。今日搵來最熟日本潮流的利時人亞凡，用型人開倉貨，即時幫街頭薯嘜亞丁來個大革新，各位薯頭準備接招喇喂。
記者：楊一凡 攝影：陳盛臣
色邊冷帽(原價$180/開倉賣$50)，螢光橙Gap尼龍衞衣(原價$340/開倉賣$100)，撞Gap軍綠色軟料鬆身褲(原價$480/開倉賣$200)，上下身都Sharp，鞋可穿Converse限量版白皮金章鞋(原價$680/開倉賣$150)，出街孭個日本版Nike背囊(原價$480/開倉賣$180)。
亞丁覺得貼身褲較難Carry，所以換條鬆身褲爽吓，讓下身看來較Slim，尼龍衞衣色水較棉質鮮豔，多洗亦不會殘；背囊另有藍拼灰的色系，男女合用。
粉紅少女中袖印字Tee打底(原價$220/開倉賣$80)，外披短身絲絨米白拉鏈外套(原價$280/開倉賣$120)，刻意玩外露加強層次感，下身是低腰貼身牛記(原價$980/開倉賣$480)，減價都要四百幾？日本名牌animalofairs嘛。下襯Converse拉鏈皮鞋(原價$680/開倉賣$380)。
眼仔精精的亞丁是活潑型少女，粉紅Tee加短外套，感覺較跳脫，貼身褲是原宿少女標記，波鞋其實隨意都OK。
求學期開始崇日，合指一算，都當了好幾十年忠實的日本Fans！亞凡抗議：「邊有咁老呀？」講笑啫，亞凡在六年前獻身日本水貨時裝生意，每月必到日本朝聖兩次，為免被客人隨手抽起一本雜誌問：「好多㗎仔着，點解你哋舖頭無呢款衫？」故此亞凡還要挑燈夜刨時裝雜誌，每月要揭幾十本中外及日本雜誌來溫故知新，對日本潮流不瞭如指掌，點搵食？
四眼中六生亞丁，慣常幫襯連鎖店，都知易跟人撞衫，但睇日本雜誌，型女衫動輒幾百，條褲賣成千蚊，波鞋又要七百幾，儲極零用錢都唔夠買一套。
亞丁變後感：睇番啲相，真係好唔同，原來人靠衣裝，係真嘅！雖然變身前後走出街行，都無乜人望，但着得有型些少，行出街都自信啲。我會買晒兩套衫，因為價錢算好合理，除咗條牛仔褲，太貴啦，唔捨得。
原價：$180至$220 開倉價：$60
在夏日豔陽高掛的日本街頭，㗎仔就是滿頭大汗，也冷帽照笠，秋天是名正言順的冷帽季節，絕對要日笠夜笠，但為求衞生乾淨起見，好趁開倉笠多幾頂替換。
原價：$280 開倉價：$80
無論是橫間、淨色或織花的圍巾，都是100巴仙羊毛，彩色冷巾方便配搭，薄如衞衣，暖若皮褸，穩如棉襖，都可繞個彩色的羊毛圈，搶吓眼。
原價：$280 開倉價：$120
型人不一定下下都着得嘩眾取寵，一件棉質校園款衞衣，軟熟保暖，遇上氣溫驟降，圍條巾，戴頂帽，簡單實際，兼且唔老土；若衞衣顏色較深沉，不妨加條七彩頸巾，睇落去夠晒醒目。
原價：$480 開倉價：$180至$200
身為型人，冇條寬鬆的運動褲傍身，又點得呢？但型人褲跟普通直筒褲有咩分別呢？當然係多些少花巧嘢啦，腰位鬆緊有啪鈕調校，褲腳闊窄由拉鏈負責，褲管側袋PatPat尾袋，統統是實用的心思設計。
原價：$480 開倉價：$90
減得至勁的AFFA本地設計尼龍夾棉褸，褸身跣水，夾棉保暖，褸帽可收埋，腰位可束緊，加上上下都有袋，十足軍人Look，有型保暖。
原價：$490 開倉價：$250
Simple所出的板鞋款式來去差不多，想說的是這個款式好襟興，加上一條長褲蓋上去，只見又平又厚的鞋底，二百幾蚊對，抵玩易襯。
原價：$150 開倉價：$60
少女和小狗原來關係都幾密切，何解？一個Cutie的小狗卡其布側袋，把少女的可愛特性發揮得淋漓盡致，就算你是個可惡少女，只要隨身孭個小狗Face袋，當堂可愛洋溢。
有心買鞋的記得出力掃幾對Converse走，事關減價鞋有十多款，每款又狠狠地割價幾百，無着開的，買對粗着都抵。拉鏈真皮波鞋，有棗紅和黑白三色任揀，另有同款布面設計，顏色較搶是橙和綠。若然認真想出位，着對彩虹鞋踩場，絕對無問題，彩虹布面有閃粉，焦點實係你啦。差點忘記提提大家，今次開倉的貨品全部來自日本，每款限量二、三十件，要買就趁手啦！
查詢電話：23691628
地址：尖沙嘴嘉蘭圍5至11號利時商場14樓1404室
開倉日期及時間：11月25至27日，下午3時至晚上10時。
備註：不設試身，只收現金。