早陣子我哋曾經率先披露過，話同屬森那美集團代理嘅越野路華（LandRover），有計劃搬離土瓜灣現址另覓新舖；及至最近終於塵埃落定，佢哋遲吓會將Showroom搬去灣仔嘅告士打道，而維修部就會搬去交通便利嘅觀塘區。故此，越野路華現址響明年3月，便會成為寶馬旗下MiniHongKong嘅大本營喇！預期MiniCooper嘅新陳列室，會參照德國總部嘅模式，究竟有幾好有幾正？不如我哋一齊去位於德國慕尼黑嘅Mini大本營，參觀一下啦！
特約記者、攝影：李勤
真係未去過，都唔知以單一車系發售嘅MiniCooper，陳列室可有幾近5千呎面積咁大，內裏除咗擺放有多款MiniCooper嘅型號外，佢重有給車迷歇息嘅Driver'sBar、專門售賣一系列Mini精品服飾嘅Shop、Mini嘅零件部門同汽車維修接待處Counter㗎！以客為尊嘅一條龍服務，又難怪班MiniFans對Mini依然咁忠心啦！
家陣響香港，周不時都會碰見五顏六色嘅MiniCooper四處走，想令自己部愛駒變得突出的話，不妨考慮吓呢套至新又有型嘅大包圍噃！暫時香港代理都未有得賣㗎！