長實趙國雄酷愛毛澤東著作，除咗精通毛語錄，亦喜歡收藏毛主席詩詞畫作，話說長實下一個重點新盤，九龍塘畢架山一號，老趙早前表示，會特別購買多幅國畫點綴物業會所，至於即將完工嘅售樓處，為增加特色同話題，實行出動私家珍藏嘅國畫。本着一貫玩神秘嘅作風，老趙起初唔肯講明係咩畫，經多番追問，才透露是有關毛主席的畫作，還附有一首七絕「為李進同志題所攝廬山仙人洞照」，詩曰：「暮色蒼茫看勁松，亂雲飛渡仍從容。天生一個仙人洞，無限風光在險峰。」老趙話，此畫乃十多年前喺拍賣會上以四十幾萬投番嚟。
另外，趙國雄重話，公司日後嘅樓盤廣告，將會全部交由「上海電影數碼」公司負責，噚日就特登着住件繡咗間公司嘜頭嘅T恤上鏡，實行做足宣傳。佢重話，上海數碼影像技術發展成熟，今次轉用該公司，日後宣傳片製作費可以慳番四成㖭。
樓盤促銷搞宣傳，好多時都會搵藝人助興。東涌海堤灣畔上個禮拜六舉行「睇住大抽獎」同「入住大抽獎」頒獎典禮，就請來英皇新晉小花3T任頒獎嘉賓。問發展商新世界何太，芸芸眾星中點解會揀佢哋呢？何太話3T有三個人，人氣多，氣氛好，況且佢吔形象健康青春，而海堤灣畔大部份係年輕買家，幾襯呀！
到場支持3T嘅fans雖然只約三十人，但勝在嗌得大聲，有氣勢。
最開心都係兩位得獎幸運兒，分別獲得本田小房車同二十二吋液晶體電視。恭喜！恭喜！
好快就到聖誕節，街上已可以聽到「又到聖誕!又到聖誕！……」等應節歌曲。信和喺距離佳節重有一個月之時宣布，以歐洲六國風土人情作主題包裝商場，又搞抽獎、攝影比賽，帶起聖誕氣氛之餘，最主要係可提升市民購物意欲。
以西班牙熱情作主題嘅商場有小西灣藍灣半島、粉嶺碧湖。俄羅斯迷情嘅有屯門黃金海岸、將軍澳海悅豪園。法國花都情緣為題係尖沙嘴帝國中心同尖沙嘴中心；荷蘭風車、鬱金香則成為尖沙嘴中港城同粉嶺帝庭軒嘅主題。另外重有芬蘭同英國風情。
禮拜日尖沙嘴人頭湧湧，廣東道同海港城就特別擠擁，幾百個地產經紀為促銷擎天半島二期，任何一個途人都唔放過。九倉黃光耀話畀蘭西聽，香港置業一名代理，上個禮拜六喺港威商場撈到個客，陪佢睇完示範單位，傾咗一陣，就決定買樓，重連買兩個，淨係呢張單已經2300萬元，佣金有40幾萬。黃光耀重打趣咁話，個經紀可以提早收爐，放假旅行。唔怪得知班經紀連行緊街嘅阿公阿婆都唔放過啦。
上次擎天半島一期開賣時，都聽到有代理游說到啲街客去睇樓，最後做成買賣樓嘅個案，今次又多一單。
新地雷霆揸fit嘅西半山寶珊道1號，終於開盤，雷生今次一反常態，聽講為統一口徑發布消息，嚴格控制代理對銷售量放風，搞到啲經紀明明成交咗都話只係入offer，神神秘秘咁。
其實個盤賣得慢都可以理解，單位要成千幾萬，喺家吓咁嘅市道，買家要諗清楚，慢慢嚟實在好正常。
可能雷爺次次賣樓都一Q清袋，今次擔心俾人笑佢失手，壓力大啩！
蘭西
電郵地址：