大口仔香取慎吾拍日劇，雖然冇木村拓哉同中居正廣咁好成績，但講到廣告香取就絕對唔輸蝕，無他嘅，論賣力同搞笑，邊有人夠佢咁抵用吖！況且佢天生大口有口福，同啲食品廣告特別有緣！
點解我羅拉話香取抵用呢？聽講佢拍廣告唔奄尖，又唔會要求貴賓待遇，重話頭醒尾幾個take搞掂，好似香取最近搶咗菜菜子嘅fran朱古力廣告合約，佢明明星期四要入廠拍電視節目，但香取竟然敢應承人哋星期一晏晝飛去巴黎拍嘢，兼且拍晒心口話三日一定搞掂！
香取一去到巴黎就即刻開工，廣告分為兩個版本，「上癮之男篇」講大口仔喺巴黎遊覽，但無論去到凱旋門定巴黎鐵塔以及其他名勝地點，都掛住食朱古力，最後重變埋巨人㖭！
而另一個版本「大懵篇」就講香取漏低咗包朱古力喺餐廳，於是跑足九條街去攞番，有班法國細路女見佢咁心急，居然陪佢一齊跑，後來發現只係為咗包朱古力，即刻大嗌嘥氣！
廣告入面有一幕講香取要跑得快過火車，佢都係兩三個take就OK！香取做嘢咁快手，當然趕得切返日本啦，難得佢重剩咗半日假逛美術館㖭！