朱總理到港之日（十一月十八日），中環就傳出中銀國際嘅分析師何綽越起身嘅消息。結果十一月二十日報紙上也有呢段新聞。何綽越點解要離開中銀國際呢？睇吓朱總理對中資機構老總嘅訓示就知道，佢講到聯繫滙率：「它（中銀國際）發表了一篇文章，不是李山（中銀國際總裁）發表的，是他那個中銀國際裏一個專家發表的，就批評聯繫滙率制。」朱總理口中嘅專家，當然係何綽越。
本來分析師寫報告批評聯繫滙率，好閒事啫，分析師係要有獨立思想、言論自由㗎。不過，總理對中資駐港機構頭頭講：「但是不要忘記我們的身份，所以一定要自律，所以不要忘記我們大多數或都說全部都是共產黨員，我們還要維護這個大局……」呢位專家何相信唔係共產黨員，鍾意寫乜就寫乜，董特首睇完佢嘅報告之後，打電話向朱總請示係唔係上頭意見，江澤民又打電話畀朱總查詢，並聲明批評聯繫滙率唔係佢嘅意思。
一篇報告，驚動江澤民、朱鎔基、董特首，何綽越都算威咯，可惜佢唔識得「自律」，要大人物提醒，自不然要東家唔打打西家。左丁山問過一位何生好耐以前嘅上司，佢話何生為人獨立自主，唔多理會partyline，寫批評聯繫滙率報告，正是何先生一貫嘅風格。分析師Eric知道何綽越離開中銀國際，渾身唔自在，恐怕「他朝君體也相同」，聯繫滙率已經成為私下講得，公開唔寫得嘅題目。