費高真係多得朗拿度唔少，如果「哨牙度」唔係突然間話病，踢唔到上個禮拜六晚場波，睇怕佢就唔會成為咗巴塞球迷嘅箭靶。
費高當年棄巴塞而揀皇馬，已被巴塞球迷列為叛徒，所以佢今次返魯營球場，其實都有心理準備會俾人掟嘢。之但係今屆由國米過檔皇馬嘅朗拿度，同巴塞球迷嘅關係都唔見得好，之前話要喺魯營入波，故此佢亦有機會好似費高咁俾人噓同掟嘢，順便同費高分擔吓。
點知皇馬喺賽前幾粒鐘，話「哨牙度」因為患感冒，踢唔到對巴塞場波，咁費高就遭殃囉。事關啲巴塞球迷見冇咗「哨牙度」，咪集中火力對付費高囉。
話時話，自從皇馬簽咗施丹同朗拿度後，費高經已唔再係一哥，而早前更有傳佢會俾球會用嚟換AC米蘭嘅舒夫真高。唔係我求大俠陰謀論，皇馬今次寧願犧牲費高，一定程度上證明咗佢已經失寵。
曼聯見利物浦俾巴素利搞到入唔到歐冠盃次圈，所以佢哋領隊費格遜就諗住向利物浦領隊侯利亞取經，問吓佢要點先可以打贏嗰支瑞士球隊。之但係，所謂「憎人富貴厭人貧」，利物浦同曼聯無論喺國內外都係競爭對手，就算利記贏唔到歐冠盃，睇怕都唔想俾曼聯攞到，所以我求大俠就唔多相信侯利亞真係會過啲堅料畀老費喇。
「萬人迷」碧咸鍾意轉髮型就係人都知，但勢估唔到佢竟然話想學阿仙奴門將施文咁留番條「馬尾辮」。施文自從留咗「馬尾」之後除咗劣評如潮之外，兼且重黑到𠵱家；碧咸今屆喺曼聯打得唔好之餘重成日受傷，若然真係要留辮嘅話，一定要有心理準備可能黑上加黑，以及唔見咗一班支持佢嘅Fans。
記得阿仙奴三年前喺歐冠盃俾當時踢費倫天拿嘅巴迪斯圖達一腳射爆，搞到入唔到次圈；佢哋會喺禮拜三對番呢位經已轉咗去羅馬嘅射手，不過佢哋領隊雲格就話唔驚，事關「巴迪高」已過晒巔峯。但我求大俠認為講嘢應留有餘地，「巴迪高」假假哋都係世界級前鋒，一個唔覺意再次射爆阿仙奴，到時雲格真係要搵窿捐。
俄羅斯體操皇后霍爾金娜噚日喺世界賽自己最拿手嘅項目高低槓決賽失手，未能贏到六連冠，我求大俠見到覺得好欷歔。呢位靚女就快二十四歲，喺體操界算係「超齡」啦，聽講佢重想參加後年嘅雅典奧運㖭，佢唔想隱退嘅原因真係𢱑晒頭，究竟係對自己信心爆棚、眷戀體操霸業、抑或俄羅斯女子體操界青黃不接呢？