恒指上周五收10065，上番8月30日個位，太A（019）現價32.60元，則低過當時35.70元高位好多，相差達3.10元。當炒藍籌升後，就快輪到炒落後藍籌。太古上周四會見分析家後，證券商發表報告，將太古盈利預測輕微調低三幾個百分點，但02年及03年PE，仍然低至10倍同9倍幾，重係偏低，上周五太A股價升20仙，炒落後行動開始。
太A炒落後，搵太ACall輪埋手，正印主角係日日有千幾二千萬份成交嘅9475，上周五收28仙，只升得0.5仙，明年5月到期，溢價9.4%，槓桿率11.6倍，好夠爆炸力。正股由兩周前嘅31元邊邊彈上𠵱家嘅32.60元，隻輪只由24仙左右上到𠵱家個位，得4仙進帳，升得唔夠，距離8月高位69仙好多。正股耐唔中發燒，一升就係幾個巴仙，9475上便嗰橛好和味，短線以上月43.5仙個位做目標價。
中移動（941）全周升50仙，聯通（762）跌20仙。先一排中移動冇乜升，炒落後跑番贏聯通好正常。兩隻熱門Call輪，9532只升0.8仙（4.3%），收19.4仙；9526升2.1仙（12.4%），收19.1仙。兩隻輪都未升得夠，9532溢價縮多一縮，靚過9526，溢價差唔多着數1個百分點。
章盛