近排港產片真係好似興起快上、快落、快出碟！好似9月28日先喺香港上畫嘅《我家有一隻河東獅》，就趕喺今個禮拜尾出DVD殺抵碟場，可能套戲國內市場反應好，所以想再下一城啩！嚟緊下星期重有一隻剛落畫無耐嘅《魂魄唔齊》會返，𠵱家睇戲真有福。
記者、攝影：朱崇德
話說宋朝名詩人蘇軾有一好友陳季常，其妻柳月娥性情頗為兇悍，蘇軾覺得好玩便以此寫了一首詩：「龍丘居士亦可憐，談空說有夜不眠，忽聞河東獅子吼，柱杖落地心茫茫。」從此「河東獅」就成惡妻的代名詞。
《我家有一隻河東獅》就是根據這個經典歷史典故拍成，講柳月娥（張栢芝飾）武功高強又性格剛烈，屢次相親都遇到挫折，偶然機會邂逅瀟灑公子陳季常（古天樂飾），二人一見鍾情，剛諗住偷偷暗「咀」之際，竟俾皇上撞破，於是即場賜婚，陳的畏妻噩夢，就自此而起。
見識過張栢芝喺劇中嘅專橫同兇惡程度，相信好易令人聯想起韓劇《我的野蠻女友》，例如做人老公，有惡妻戒條，事無大小，有乜唔合心意馬上就大打出手，都是似曾相識嘅橋段，所以國內好多網上Fans，都話《我家有一隻河東獅》係《我的野蠻女友》古裝版。
但講到靚女同野蠻「可愛」程度，可能筆者係一個標準港式小男人關係，都係覺得「家花」唔及「韓花」香，加上張拍此劇時正值個人情感出現問題困擾，面容憔悴再加身形勁瘦，真係好難重拾剛出道拍電影《星願》時，那種叫人有眼前一亮的神采！雖然在姿色上稍為扣分，幸好在演出上，表現非常稱職，尚可以用演技搭夠。
必睇Bonus
Bonus部份主要係製作特輯同從未公開嘅刪剪片段，Making部份影番佢哋喺40幾度高溫下在國內拍攝，再加埋咬到「起水泡」嘅惡蚊環伺下拍攝，真係令人非常敬佩！刪剪片段都有兩段幾好睇；一段講張栢芝搵人測字睇幾時嫁得出，一段講許紹雄無厘頭，搵隻真碟玩捽碟始祖，都值得一睇！
*憑《蘋果日報》本版報道到DVShop購買《我家有一隻河東獅》，特價$55，只限今天。
售賣點：DVShop
地址：深水埗福榮街107號地下
電話：21949100