今個星期濱崎步有隻3區嘅《沈月》（$98）DVD新返，碟內除咗收錄有步姐新歌《Voyage》之外，重有以此曲而改編而成嘅長篇音樂電影《沈月》；不過最鬼馬都係個「Making」，工作人員專揀濱崎步一啲搞笑同咬手指一類小動作嚟拍，步姐迷必睇。另外，今次呢隻碟嘅畫質同5.1聲效做得唔錯，旺角好多AV舖都話可以搵佢嚟做試機碟，絕對值得一買。
技術問題延遲現身
隻《魔戒首部曲：魔戒現身》4碟超級豪華套裝，原本鐵定話今個星期喺碟場「現身」，不過筆者收到風，由於個最新dtsES6.1環迴立體聲效果，同中文字幕有啲技術衝突，所以搞到遲遲都出唔到碟，令到一眾訂咗碟嘅魔戒迷，今個星期撲咗個空。據行內人士透露，呢個技術衝突問題，好似至今都唔可以完全搞掂，訂咗嘅人，我諗都重要有排等！
硬碟收到風，《魂魄唔齊》下星期會出DVD（真慘！我啱啱先喺戲院畀錢入場睇，咁快又話出碟！），最鍾意佢以大家較少接觸到嘅「大戲」為主題，令我哋呢啲年輕一代，可以對「大戲」呢類國粹加深認識。套戲以陳奕迅同容祖兒擔正做主角，話說容為一女鬼，要求陳幫佢演《樓臺會》，好了結心願去投胎轉世，不過當中過程，當然笑料百出啦！最喜歡謝霆鋒個爛賭二造型，雖然係客串性質，但勁型！而且套戲以探討人生為主題，睇得人笑中有淚，值得期待！
今個星期另一正片推介，係由金像影帝梁家輝，及百花影后蔣雯麗所飾演的《刮痧》（$68，3區），故事主要講述梁及妻兒剛移民美國，後因文化上的差異，醫院人士為其子作檢查時，誤認「刮痧」瘀傷是梁虐兒，法庭暫剝奪其監護權！故事非常感人，而且移民及法律事件又十分生活化，幾有參考價值，想當年此片公映時，曾獲中國十大最佳電影銀獎，值得向大家推介。
發行：時碼媒體
文：硬碟