左慧琪日前到尼日利亞準備參加下月舉行的「世界小姐」競選，其間因為有回教徒反對在當地舉行選美而發生暴動。大會為佳麗安全起見，決定撤離尼日利亞，改在英國倫敦舉行「世姐」選舉。對大會今次的決定，無綫和左慧琪父親左禮宜大表支持和贊成。
應屆港姐亞軍左慧琪本月十一日抵達西非國家尼日利亞，準備參加下月七日在當地舉行的「世界小姐」競選，沒料到當地發生暴動，有回教暴徒因為反對尼日利亞舉辦「世姐」選美，而於上周四和周五在尼日利亞北部城市卡杜納濫殺途人和焚燒建築物，造成至少一百零五人死亡，以及五百多人受傷。
選美大會為佳麗安全起見，昨日宣布將選美地點移師到英國倫敦，還即日起安排佳麗分批撤離於尼日利亞下榻的酒店。
對於大會今次決定，無綫和左慧琪父親、任職警司的左禮宜均表示贊成和支持。
無綫外事部助理總監曾醒明昨日在電話中說：「今朝早（昨日）我哋已經同左慧琪屋企人聯絡，知道左慧琪啱啱打過電話畀屋企人報平安。我哋啱啱接到消息，知道大會決定將『世姐』改喺英國倫敦舉行，左慧琪呢一、兩日會離開尼日利亞，然後入住倫敦嘅酒店，但選美日期就唔會變。」
曾醒明表示大會是基於參選佳麗安全而作出今次決定，無綫當然會尊重，曾醒明說：「呢件始終係國際盛事，當然希望喺和平氣氛下舉行。大會今次決定係明智嘅，離開動亂環境係相當適合，而佢哋有咁多年主辦經驗，知道點樣先至係最安全同最方便嘅方法。唔止係無綫，就連左慧琪爸爸都贊成同支持大會決定。」
而林敏俐前晚出席無綫在灣仔舉行的聯歡晚宴時，表示擔心左慧琪，她說：「我係好擔心，不過相信佢都好安全，前兩日先同過佢傾電話，我話好掛住佢。遲啲我會代表香港參加『國際華裔小姐』選舉，所以等左慧琪返香港後，我會請佢返屋企食飯，順便問吓佢嘅心得。」林敏俐並表示左慧琪原打算選美後到英國探望祖母，現改到英國參選，可謂更加方便呢！
此外，嘉碧儀昨日在電視城說：「左慧琪日前先覆過我，我都有收過佢嘅明信片。我諗呢件事公司會處理。」
採訪：戴彩煥、卓寶花
攝影：卓寶花