我大口羅拉雖然奉旨日日帶班靚女上場孝敬讀者，但亦唔會忽略一班鍾意年輕靚仔嘅女讀者。今次為大家公開日本三人少男組w-inds嘅童年片，一定令啲女fans大叫「卡娃咿呢」！
w-inds上次開完處男日本巡迴騷後，佢哋嘅演唱會寫真集好賣到要加印，真係多得班女fans支持，事務所即刻安排三個成員各自推出個人寫真，入面除咗有fans一定會覺得型到跌渣嘅靚相之外，重有佢哋從未公開嘅BB相。
現年十六歲嘅主將慶太話過自己媽咪以前係DJ，所以令佢好鍾意音樂，佢真係冇講大話，出世幾個月腦囟未生埋，媽咪已經畀佢戴耳筒聽音樂，一早培養佢對音樂嘅興趣。而同樣係十六歲嘅龍一喺三歲嗰陣已經活潑好動，帶住口水肩嘅佢重好鍾意食雪條，嗰年佢重去過夏威夷，細細個喺沙灘上已經識得擺甫士，抵佢食呢行飯。
至於跳舞好勁、現年十八歲嘅涼平，細個嗰陣塊面圓碌碌，但到小學就唔似一碌木，上家政堂嗰陣又識擺甫士，成個小明星咁款！