白鴿黨主席馬丁歐遊十一日，噚晚終於返到香港，佢今次為咗反對二十三條立法，去完美國又去歐洲，八方見佢唔只成個人瘦晒，就連荷包都大縮水。事關馬丁周圍飛，全部都係自己科水，雖然小甜甜單官司進帳不少，但點計都係錢嚟嘅。
作為大狀，馬丁梗係要顧及形象，在歐洲咁多日，除咗瞓覺之外，佢成日都着住套三件頭老西，Burberry乾濕褸，同埋一對擦到「立立令」嘅皮鞋，成個紳士咁。馬丁平日行慣山，以為自己去到邊都咁行得，結果早喺布魯塞爾就有車都唔搭，希望行吓活動吓；點知去到倫敦成日塞車，有車難搭，結果又係成日行嚟行去，終於就出事！
最後一晚喺倫敦，馬丁發現自己隻左腳痠痠痛，之後大清早飛去日內瓦，副「老骨頭」真係唔生性，行路要拐吓拐吓，痛到連見到靚絕嘅湖光山色都唔行得。為咗二十三條行到自己「跛」咗，都算出錢又出力嘞。
傳真︰2623-9278
電郵︰