上個星期二無綫嘅《萬千星輝賀台慶》，除咗港姐冠軍林敏俐例牌要坐喺六叔邵逸夫隔籬之外，港姐季軍胡家惠同卓越才藝獎得主蔡潔雯亦都要陪住六叔，就好似包青天得力助手王朝同馬漢咁傍住包大人。
平時啲港姐扶六叔，多數係畀隻手六叔承住度力，等佢老人家行嘅時候有啲嘢扶吓，但蔡潔雯同胡家惠當晚可能太過緊張，佢哋扶六叔行嗰陣，竟然好似押解犯人咁樣，唔止令到六叔好唔舒服，就連無綫高層望落去，都覺得好礙眼，高層話兩位港姐咁搞法，會令人產生錯覺，以為六叔行步路都好辛苦咁！
馮仁昭八到無綫高層對兩位港姐今次嘅表現相當不滿，猛咁投訴呢兩位港姐，重話唔希望第日再有類似嘅事發生。不過，照馮仁昭估計，胡家惠同蔡潔雯今次咁搞法，睇怕都冇下次啦！
麥浚龍（Juno）噚日去電視城，為音樂特輯《Juno與他的迷失空間》開鏡拜神。呢個已經係Juno三個月內為無綫拍嘅第二個音樂特輯，因臨近年尾頒獎禮，所以惹來換獎之說。噚日呢個特輯嘅監製陳家倫話：「係唱片公司傾嘅，好多歌手都會咁做，當係買個廣告時段囉！」
黃家強前晚去浸會大學，為一個校園bandshow做嘉賓。講開有啲band友唱粗口歌，家強就話：「我覺得就算幾憤怒，都唔一定要用粗口嚟表達，我哋要做有知識嘅音樂人，唱粗口歌同爛仔冇分別。」唔知唱過粗口歌嘅LMF同黃秋生有乜感想呢？
謝霆鋒前晚約咗容祖兒同唱片公司嘅工作人員，一齊喺裕景花園寓所嘅天台BBQ。據知霆鋒因串謀妨礙司法公正案罪成，被判履行社會服務令，佢咁多日都冇出街，所以前晚約埋成班老友輕鬆吓。霆鋒近日發福唔少，大家都玩得好開心。
英皇3T小花鄭希怡（Yumiko）、劉思惠（Maggie）同蔣雅文（Mandy），噚日去東涌東薈城宣傳新樓盤「海堤灣畔」。𠵱家做新人經常要問公司借錢，Yumiko話：「我𠵱家唔使問屋企人攞錢，重有少少家用畀屋企，已經好好。」自己一個住嘅Mandy就話好唔掂先會叫公司幫手喎。講到幾時買樓，佢哋三個一齊話：「發夢就有，芭比嘅樓就買到！」