捨棄高薪的市場工作，變身為每天煮飯的私房菜老闆娘，阿May不但毫不後悔，反而愈煮愈高興，年多以來更認識一班同樣熱愛烹飪的朋友。每月舉行的烹飪班，學員多為熟客仔，阿May除授課外，在中場等待焗麵包的時候，更捧出精美茶點及火燄雪山給學員享用，難怪學員都不約而同告訴我，每次上完堂都好飽好飽……
記者：陳珮娟 攝影：楊錦文
示範場地：銅鑼灣富明街寶明大廈4樓Eatlover
逢星期一至日刊出
中場休息的時候，阿May捧出火燄雪山，食到大家舔舔脷！
「細細個嗰陣我已經好鍾意煮嘢食，除了經常鑽研烹飪書，又試過參加唔同嘅烹飪班，以及跟隨大廚學煮，跟兩位好朋友合資開咗間私房菜，可以將興趣變成工作，好開心！」阿May直言。有心研究烹飪自然不停有創意，如她一直覺得粟米好好味，覺得若麵包內加一些有咬口的東西，亦不會那麼寡，所以便用粟米來試試！只見大家跟着阿May的指示，一時落水、一時搓粉，突然間又有人尖叫，原來忘了將戒指除下，變成粉糰戒指！
高筋麵粉200克、黃粟米粉50克、奶粉10克、乾酵母1茶匙、鹽1/4茶匙、忌廉粟米茸100克、蛋1隻、溫水1/4杯、牛油15克、粟米粒20克
麵包看似很硬，外貌跟法式長麵包有點相像，只是一切開啡色的外皮，便是軟軟熟熟的麵包，入口微甜，又有粟米香味，Yummy！
阿May說有次逛街時看到這種焦糖茶葉，由於味道太香的緣故，便一心買回家沖茶喝，隨後更靈光一閃，想着可否利用這種焦糖茶葉來做甜品，結果便誕生了這款蛋糕。
牛奶1/2杯、無鹽牛油6安士、焦糖茶葉1湯匙、蛋4隻、糖粉6安士、麵粉8安士、發粉2茶匙、鹽1/4茶匙
蛋黃3隻、糖粉2安士、牛奶1杯、麵粉1湯匙、粟粉1湯匙、呍呢拿枝1枝
黃糖8安士、奶1杯、牛油4安士
1 牛奶及焦糖茶葉加熱至微滾，熄火將茶葉隔去，下無鹽牛油待溶化，搞勻備用。
2 用打蛋器將雞蛋及糖粉打至發白，放已篩的麵粉、鹽及發粉，加入（1）拌勻，將蛋糕漿傾入已預熱至攝氏180度的蛋糕盤，放焗爐焗40分鐘。蛋糕待涼，橫切一半備用。
3 將吉士材料中的蛋黃、糖、粟粉及麵粉拂勻成吉士蛋黃糰。用刀刮開呍呢拿枝，將內裏的呍呢拿豆刮入牛奶內，加熱至微滾倒入蛋黃糰內，再回㷛慢火煮至稠身，待涼備用。
4 把製成焦糖糖漿的材料加熱至攝氏225度，離火後再用打蛋器打至滑身。
5 將吉士塗在已橫切的蛋糕上，最後淋上焦油糖漿即成。
自從跟阿May學做麵包後，每天都會做啲麵包，食自己焗的麵包做早餐，今次學嘅粟米麵包唔係太難，回家後又會試試！
今次係我第10次參加烹飪班，所以阿May特意送上一份禮物畀我，又食又拎！個粟米麵包有少少甜味，又有粟米粒入口，唔錯！