天爺喺星期二嫁女，席設君悅酒店，碰啱朱總理在此下榻，兼夾晚上封路，於是賓客到場，特別麻煩，好彩《蘋果》讀者多，唔少老友記睇完「GG細語」，當晚特別提早到場，原來我哋入宴會廳，亦要安全檢查，X光機特別侍候女士手袋，兼夾要行過金屬探測門，情況有如上飛機。
左丁山對一位老友講：「下次你訂邊間酒店請飲都好，特別要問埋會唔會同國家領導人入住日期撞噃，係就唔好訂咯，以免麻煩。」老友話：「怕只有呢間君悅先至特別要問多一句咋啩！」
到場參加嘅賓客，大都係傳媒人或社會福利界（梁太退休前係社署高官），好多專欄作家名嘴在場，假如君悅搞得唔好，恐怕全港都會聽到聲音，不過君悅應付慣大場面，好少失拖嘅，只是席上見到兩位食神，其一係元朗大榮華嘅肥佬韜，其二係鏞記大公子成哥，以韜哥、成哥平時嘅飲食標準，君悅啲乳豬、蒸石斑、炸子雞掂唔掂呢？
呢次婚宴好有特色，就係完全冇玩新郎新娘啲三級低趣味，令人反胃；代替品就非常有文化咯，左丁山飲過咁多餐結婚酒，都未曾見過，首先由新娘中學女同學朗誦英詩，講述一對新人嘅戀愛史，跟着兩位女同學鋼琴獨奏、鋼琴大提琴合奏，然後新娘堂妹（理工大學副校長梁天培嘅千金）自彈鋼琴獨唱，十足EltonJohn咁嘅款，男家亦有同學誦讀（英文）祝福獻詞，充份表現新郎新娘都好有文化修養。