瘦田冇人耕，耕開有人爭；野牛冇人理，傳媒一報道就爭住理。話說俾牛湊大嘅新界地王發叔劉皇發，噚日大鑼大鼓走去大棠考察收容流浪牛嘅原居牛之家，名嘴鄭經翰、立法會議員何俊仁同立法會議員石禮謙都去埋一份。
發叔探望牛牛，係想睇下原居牛之家適唔適合收容一隻大水牛。隻大水牛早輪誤闖馬路，俾漁農自然護理署拉咗，正面臨宰割做牛丸嘅時候，有善心人打電話上電台求助，要求漁護署放咗佢，隨即掀起一場救救大水牛行動，悲天憫人。
本來事件主角係啲牛先啱，點知俾個細路搶晒風頭，佢就係首度曝光嘅發叔嫡孫泰熙嘞。發叔喺龍鼓灘務農出身，但係兩歲嘅泰熙盡失爺爺真傳，對班牛牛一啲興趣都冇。大班問佢買晒啲牛好唔好，小泰熙一口拒絕，問佢鍾唔鍾意牛牛，又擰頭。
講番原居牛之家，奇女子洋洋喺九七年向元朗區議員梁福元租借得來，如今地主想收回，洋洋惟有另覓地方。洋洋希望可以撥地安置流浪牛，如果政府唔肯嘅話，發叔已經拍心口幫手搵地方，等啲流浪牛唔使日夜驚住俾人捉去劏。
（圖）兩歲嘅泰熙雖有一個愛牛嘅爺爺，但佢對班牛牛似乎冇乜興趣。 黃賢創攝
傳真︰2623-9278
電郵︰